لاہور(پاکستان پوائنٹ نیوز13۔مارچ2017ء) چیئرمین پی سی بی شہریار خان نے آکھیا اے کہ ساڈی ٹیم فٹنس تے فیلڈنگ پاروں ہور ٹیماں توں بہت پچھانہ رہ گئی اے، کھڈاریاں دی فیلڈنگ تے فٹنس نمبر ون ترجیح اے، پتا اے کہ جواریاں نے نویں طریقے کڈھ لئے نیں۔ تفصیل دے مطابق لاہور وچ میڈیا نال گل بات کردے ہوئے شہریار خان دا کہنا سی کہ کھڈاریاں وچ سبھ توں پہلی ترجیح فٹنس اے، مُنڈے سمجھ لین فٹ نہیں ہون گے تے ٹیم وچ تھاں نہیں ملے گی۔
اوہناں دا کہنا سی کہ مُنڈیاں نوں ذمے واری دا وکھالا کرنا چاہیدا، ٹیم وچ رلت لئی فٹنس نوں معیار بنا دِتا اے، کوچ نوں آکھ دِتا اے کہ فٹنس اُتے کوئی سمجھوتا نہ کرو۔ شہریار خان دا کہنا سی کہ میچ فکسنگ وچ ملوث کھڈاریاں نوں رعایت نہیں ملے گی۔ اوہناں دا کہنا سی کہ کوئی پاکستان دی ٹوپی پا کے نکلے تے اوہد ی ذمے واری عائد ہو جاندی اے۔ اوہناں دا کہنا سی کہ دورا انگلینڈ، آسٹریلیا تے نیوزی لینڈ دے دوران چیئرمیناں دا خط آئے کہ تہاڈی ٹیم دا کنڈکٹ بہت بہتر رہیا اے، مصباح الحق نوں چنگے رویے پاروں ایوارڈی وی دِتا گیا۔
چیئرمین پی سی بی دا کہنا سی کہ محمد عرفان، شاہ زیب حسن خلاف ثبوت نہیں سن ایس لئی اوہناں نوں معطل نہیں کیتا، شرجیل تے خالد لطیف خلاف ثبوت سن ایس لئی اوہناں نوں معطل کر دِتا۔ اوہناں دا کہنا سی کہ ٹربیونل دا جو وی فیصلا آئے گا اوہنوں مَناں گے۔ اوہناں دا ہور کہنا سی کہ جواریاں نے نویں طریقے نال رشتے دار تے دوستاں راہیں رابطا کردے نیں، جو جواراں دیاں گلاں وچ آئے گا اوہدا کیریئر ختم ہو سکدا اے، کوئی قصور وار ہووے تے سمجھ لوے اوہدا کیریئر ختم ہوگیا۔
