لاہور(پاکستان پوائنٹ نیوز09۔مارچ2017ء) قومی کرکٹ ٹیم تے پشاور زلمی دے فاسٹ باﺅلر وہاب ریاض ڈیرن سیمی دی ٹنڈ والی ویڈیو اُتے جواب دین وچ سارے کھڈاریاں اُتے بازی لے گئے، اوہناں دا کہنا سی کہ کیہ اسیں سارے پھڑے گئے آں جو ٹنڈ کروا لئے۔ تفصیل دے مطابق ڈیرن سیمی نے ہانگ کانگ وچ ٹنڈ کروان مگروں سوشل میڈیا اُتے ویڈیو اپ لوڈ کر کے پشاور زلمی دے ہور کھڈاریاں نوں وعدا یاد دوایا تے اک نجی ٹی وی نے وہاب ریاض نال رابطا کر کے سوال کر دِتا کہ اوہ ہن ٹنڈ کروا رہے نیں یاں نہیں؟ وہاب ریاض نے جواب دِتا کہ تُسیں وعدا کردے ہوئے سیمی نوں ویکھیا سی، ساڈی ٹنڈ ہونا ضروری اے؟ پرچا کار نے آکھیا کہ کھڈاری تے کپتان دی گل مندے نیں۔
جہدے اُتے وہاب ریاض نے آکھیا کہ بالکل اسیں کپتان دی گل مندے آں تے ایہو وجہ اے کہ پشاور زلمی کامیاب وی ہوئی اے پر کھڈاری جدوں اکٹھے ہون گے تے ایس ٹنڈ والے معاملے اُتے گل کراں گے۔ پرچا کار نے آکھیا یعنی جدوں سارے اکٹھے ہون گے تے فیر اجتماعی ٹنڈ کرواﺅ گے؟ وہاب ریاض نے ہسدے ہوئے جواب دِتا کہ میں ایہ نہیں آکھ رہیا کہ ٹنڈ ہووے گی، ہو سکدا اے کہ اسیں ایس فیصلے نوں ختم ای کر دیے۔
سوانی پرچاکار نے آکھیا کہ تُسیں ٹنڈ کروا لوو، کیہ پتا تہانوں جچ جائے؟ جواب وچ وہاب ریاض نے آکھیا کہ جچے یاں نہ جچے پر اجے ویلا نہیں آیا تے جدوں ویلا آئے گا فیر ویکھاں گے۔ پرچا کار نے اک وار فیر آکھیا کہ تُسیں ویکھ لوو، جشن منا رہے او پر ٹنڈ نہیں کروا رہے۔ وہاب ریاض نے دلچسپ جواب دِتا کہ اسیں لوک کہڑے پھڑے گئے آں جو ٹنڈ کروا لئے۔
