لاہور(پاکستان پوائنٹ نیوز13۔فروری2017ء) پاکستان سپر لیگ دے دوجے ایڈیشن وچ ہائی سکورنگ میچ نہ ہون پاروں کرکٹ چاہیوان مایوس، دلچسپی گھٹن لگی۔ تفصیل دے مطابق دنیا بھر وچ کھیڈی جان والی لیگز نوں ویکھیا جائے تے ایہناں لیگز دی انتظامیا بیٹنگ یاں سپورٹنگ وکٹاں تیار کروائیاں نیں تاں جے بیسٹمین زیادا توں زیادا چھکے چوکے لا ن تاں جے کرکٹ چاہیوان کھیڈ نوں انجوائے کر سن پر پی ایس ایل انتظامیا معیاری وکٹاں دی تیاری وچ ناکام رہی اے۔
ہائی سکورنگ میچ نہ ہون دی وجہ توں کرکٹ چاہیواناں دی کھیڈ وچ دلچسپی گھٹ رہگی اے، جے پی ایس ایل ٹو وچ ہن تیکر کھیڈے گئے 6میچاں وچوں صرف پہلا میچ ای چنگا رہیا جہدے وچ پشاور زلمی نے 190سکور بنائے۔ لاہور قلندرز تے پشاور زلمی وچکار 12فروری نوں کھیڈیا جان والا میچ ایس لحاظ نال مایوس کن رہیا اے ایس میچ وچ لاہور قلندرز پی ایس ایل دے سبھ توں گھٹ سکور ٹوٹل 59اُتے آﺅٹ ہو گئی تے پشاور زلمی وی بڑیاں اوکڑاں نال 17ویں اوور وچ صرف تن وکٹاں توں میچ جِت سکی۔ ایس میچ دی وکٹ کسے وی لحاظ نال معیاری نہیں سی۔ ایس توں وکھ پی ایس ایل دے 6میچاں وچوں صرف 3میچاں وچ 150توں ودھ سکور ہویا جہدی وجہ توں دبئی کرکٹ سٹیڈیم وچ تماشائیاں دی گنتی گھٹ ہوندی جا رہی اے۔
