دبئی(پاکستان پوائنٹ نیوز11۔فروری2017ء) اک پاسے جتھے پاکستان سپر لیگ وچ سپاٹ فکسنگ سکینڈل ساہمنے آن مگروں کرکٹ دی دنیا وچ بھونچال آیا ہویا اے اوتھے اک بک میکر نے دعوا کیتا اے کہ لاہور قلندرز اج اسلام آباد یونائیٹڈ خلاف شیڈول میچ جِت جائے گی۔ نجی ٹی وی چینل نال گل بات کردے ہوئے ناں نہ دَسن دی شرط اُتے اک بک میکر دا کہنا سی کہ اسیں کھڈاریاں دے دوالے اپنے ایجنٹ چھڈے ہوندے نیں، اسیں آپ کدی ساہمنے نہیں آئے بلکہ اوہناں راہیں ای کھڈاریاں نال تعلق بناندے آں تے اوہی اوہناں دی ریکی وی کردے نیں۔
ذکر کیتے گئے بک میکر دا کہنا سی کہ ساڈی ساری گل بات کوڈ ورڈ وچ ہوندی اے تے اوہ کوڈ ورڈ کُجھ انج ہوندے نیں کہ گھر 50لکھ دا وِک رہیا اے۔ جواریے نے دعوا کیتا کہ اسلام آباد یونائیٹڈ تے لاہور قلندرز وچکار اج شیڈول مقابلے وچ دفاعی چیمپیئن میچ ہار جائے گی۔
