اسلام آباد(پاکستان پوائنٹ نیوز27۔جنوری2017ء) سوئس بنکاں وچ پاکستانیاں دے 200ارب ڈالر دا کھوج لان لئی سوئس حکومت نال ہون والا سمجھوتا چھ مہینیاں توں سستی دا شکاراے، دوجے پاسے ہن سرکاری سطح اُتے ضابطے دی باقی کارروائی مکمل کرن وچ وی دلچسپی گھٹ ہو گئی اے۔ میڈیا رپورٹ دے مطابق چھ مہینے پہلے پاکستان تے سوئس حکومت وچکار سوئس بنکاں وچ موجود پاکستانیاں دے بنک کھاتیاں دیاں معلومات دے وچار وٹاندرے دا سمجھوتا ہویا سی جہدی وفاقی کابینہ نے وی منظوری دے دِتی سی۔
ذکر کیتے گئے سمجھوتے وچ طے کیتا گیا سی کہ پاکستان وچ سوئٹزر لینڈ دے سفیر تے چیئرمین فیڈرل بورڈ آف ریونیو ایس سمجھوتے اُتے دستخط کر کے اپنیاں حکومتاں نوں ایہدے اُتے عملدرآمد دی تاریخ طے کرن تے ایس سمجھوتے نوں پوری طرحاں آپریشنل بنان دا فیصلا کرن گے۔ ایس سلسلے وچ فیڈرل بورڈ ریونیو نے پاکستان وچ سوئس سفیر نوں بلان لئی پاکستانی وزارت خارجا نوں خط لکھیا سی پر کئی مہینے لنگھن مگروں وزارت خارجا سوئس سفیر نال چیئرمین ایف بی آر دی ملاقات دا ٹائم فریم طے نہیں کرا سکی۔
متعلقا حکام نے رابطے اُتے آکھیا کہ جدوں اعلا سطح اُتے اینی سُستی دا وکھالا کیتا جا رہیا اے تے ایس معاملے نوں ہوا دین دی کوئی لوڑ نہیں۔ حکام نے دسیا کہ سمجھوتے اُتے عملدرآمد دے فوری بعد پاکستان سوئس بنکنگ عدالتاں نال رابطہ تے اوہناں کولوں پاکستانی باشندیاں بارے معلومات حاصل کرسکے گا جہناں دے پچھلے ادھی صدی وچ کسے وی سال سوئس بنکاں وچ اکاﺅنٹ رہے۔
