پارلیمانی رہنماواں دا اجلاس، سپیکر قومی اسمبلی سردار ایاز صادق ولوں استعفے دی پیشکش

پارلیمانی رہنماواں دا اجلاس، سپیکر قومی اسمبلی سردار ایاز صادق ولوں استعفے دی پیشکش

اسلام آباد(پاکستان پوائنٹ نیوز27۔جنوری2017ء) پچھلے دیہاڑے قومی اسمبلی وچ حکومتی ارکان تے اپوزیشن وچکار ہوئے جھیڑے اُتے پارلیمانی رہنماواں دا اجلاس ہویا۔ تفصیل دے مطابق اجلاس وچ قومی اسمبلی دے سپیکر سردار ایاز صادق نے استعفے دی پیشکش کیتی پر پارلیمانی رہنماواں نے ایس پیشکش دی مخالفت کیتی۔ سپیکر قومی اسمبلی نے آکھیا کہ سیکرٹریٹ نے دسیا کہ شہریار آفریدی دی رکنیت اثاثیاں دیاں تفصیلاں جمع نہ کران دی وجہ توں معطل اے۔

اوہناں نے آکھیا کہ پچھلے دیہاڑے قومی اسمبلی و چ ہون والے جھیڑے دوران دوواں پاسیوں زیادتی ہوئی۔ سپیکر نے آکھیا کہ تحریک استحقاق معاملے دی جڑ نہیں پر معاملا ضرور اے۔ عدالتی معاملے اُتے ایوان اندر بحث نہیں ہو سکدی۔ سپیکر قومی اسمبلی نے دسیا کہ اج اجلاس وچ پارلیمانی رہنماواں دا رویہ چنگا سی، کُجھ رہنماواں نے اپنی جماعت نال مشورا کرن مگروں تجویزاں دین لئی ویلا منگیا اے۔ اوہناں دا کہنا سی کہ پیر نوں 3وجے دوبارا پارلیمانی رہنماواں دا اجلاس ہووے گا۔اجلاس دوران آئندا دا لائحہ عمل بنایا جائے گا۔