اسلام آباد(پاکستان پوائنٹ نیوز18۔جنوری2017ء) سپریم کورٹ وچ پاناما لیکس بارے درخاستاں دی سنوائی دا سلسلا جاری اے۔ تفصیل دے مطابق جدوں توں پاناما لیکس دا معاملا ساہمنے آیا اے اودوں توں ای وزیر اعلا پنجاب میاں محمد شہباز شریف چُپ نیں تے اوہناں نے اپنے وڈے بھرا یاں اوہناں دے خاندان دیاں آف شور کمپنیاں تے پاناما کیس وچ ناں آن اُتے کسے ردعمل دا وکھالا نہیں کیتا۔
نجی ٹی وی چینل دے اک پروگرام وچ گل بات کردے ہوئے مشہور پرچاکار عارف نظامی تے غلام حسین نے ایس گل نوں اگانہ ٹوردے ہوئے دسیا کہ نواز شریف دے خاندان نوں شہباز شریف نال ایہو گِلا اے کہ جدوں دا اوہناں اُتے پاناما دا پہاڑ ڈِگیا شہباز شریف تے اوہناں دے خاندان نے میدان وچ آکے اوہناں دا دفاع نہیں کیتا۔ غلام حسین نے آکھیا کہ میں ایہ سنیا اے کہ شہباز شریف دے خاندان نے آکھیا اے کہ پاناما لیکس وچ موجود آف شور کمپنیاں تے نواز شریف پیسےاں نال ساڈا کوئی تعلق نہیں۔
یاد رہوے کہ شہباز شریف نے نواز شریف یاں اوہناں دے خاندان دے پاناما لیکس معاملے وچ شامل ہون اُتے کوئی ردعمل نہیں دِتا بلکہ اوہدے اُلٹ اوہ چُپ وٹے ہوئے نیں، جہدے توں ایہ لگدا اے کہ شہباز شریف نوں ایس سارے معاملے دا پتا اے تے اوہ مصلحت دے طور اُتے چُپ نیں۔
