اسلام آباد(پاکستان پوائنٹ نیوز18۔جنوری2017ء) سپریم کورٹ وچ پاناما لیکس بارے کیس دی سنوائی کل تک ملتوی کر دِتی گئی۔ سپریم کورٹ دے باہر میڈیا نال گل بات کردے ہوئے پی ٹی آئی چیئرمین عمران خان دا کہنا سی کہ شریف خاندان دی منی لانڈرنگ بارے اسحاق ڈار دا اعترافی بیان ساہمنے اے۔ اوہناں نے آکھیاکہ کورٹ وچ اوہناں دے وکیل دے مونہوں حسین نواز شریف دی اک ہور سٹیل مل نکل آئی اے۔
پتا چلیا اے کہ کسارے والی سٹیل مل بال دیندی جا رہی اے۔ عمران خان نے آکھیا کہ ایف آئی اے دی 1998دی رپورٹ موجود اے، جہدے توں صاف ظاہر اے کہ منی لانڈرنگ کیتی گئی۔ اوہناں نے حکومتی جماعت دے سربراہ نوں تنقید دا نشانا بناندے ہوئے آکھیا کہ حسین نواز نے 52کروڑ نواز شریف نوں تحفے وچ دِتے، اج تے سپریم کورٹ نے وی پُچھ لیا کہ ایہ پیسے کتھوں آئے؟ عمران خان نے آکھیا کہ ایہ لوک آکھدے سن اسیں زرداری دا احتساب کراں گے پر نواز شریف آپ منی لانڈرنگ کردے رہے جدکہ ایہ آصف زرداری دا احتساب کیویں کر سکدے نیں؟ کپتان نے آکھیا کہ شریف خاندان مشرف نال سمجھوتا کر کے باہرلے ملک گیا سی۔
اوہناں دا کہنا سی کہ منی لانڈرنگ دا پیسہ پہلے ملکوں باہر گھلیا تے فیر واپس لیاندا گیا، شریف خاندان نے این آر او دے بعد میثاق جمہوریت کیتا۔ اوہناں دا کہنا سی کہ جدوں ملک اندر وزیر اعظم تے وزیر خزانا منی لانڈرنگ کرن تے ملک دا کیہ مستقبل اے؟
