اسلام آباد(پاکستان پوائنٹ نیوز09۔جنوری2017ء) سپریم کورٹ وچ پاناما لیکس بارے درخاستاں دی سنوائی دا سلسلا جاری اے۔ تفصیل دے مطابق سپریم کورٹ نے پاناما لیکس بارے درخاستاں دی سنوائی کل تیکر ملتوی کر دِتی اے۔ کل ہون والی سنوائی وچ وی پی ٹی آئی دے وکیل نعیم بخاری اپنے دلائل جاری رکھن گے۔ سنوائی دوران جسٹس عظمت سعید نے آکھیا کہ شریف خاندان دے کاغذات نامکمل نیں۔
جسٹس عظمت سعید دا کہنا سی کہ شریف خاندان دے وکیلاں نوں بہت سارے معاملات دا جواب دینا پئے گا۔ سنوائی دوران اوہناں نے آکھیا کہ آف شور کمپنیاں دا بیریئر سرٹیفکیٹ جہدے کول ہووے اوہی مالک ہوندا اے، جے سرٹیفکیٹ حسین نواز کول اے تے اوہ مالک دے طور اُتے ٹرسٹ ڈیڈ کر سکدے نیں۔ شریف خاندان نے بہت ساریاں دستاویزات جمع نہیں کروائیاں۔ شریف خاندان دے وکیل ساریاں دستاویزات دے دیندے تے تہانوں موقع نہ ملدا۔
اوہناں نے آکھیا کہ جس فریق نے جو دستاویزات جمع کروائیاں نیں اوہ اوہدا جواب دیوے گا، ایہ اک سفر اے جو سچ دی بھال لئی اے، اک دن آئے گا جدوں پاکستانی لوکائی سچ پہچان جان گے۔ سنوائی ملتوی ہون دے بعد میڈیا نال گل بات کردے ہوئے پی ٹی آئی رہنما نعیم الحق دا کہنا سی کہ وزیر اعظم نے اپنی تقریر وچ سارے ریکارڈ موجود ہون دا ذکر کیتا سی۔ نواز شریف غلط بیانی کر کے اپنے حلف دی خلاف ورزی کر چکے نیں جہدے بعد ہن نواز شریف کول عہدے اُتے رہن دی کوئی جواز نہیں۔
اوہناں نے مطالبا کیتا کہ بیگم کلثوم دا بیان وی عدالت وچ جمع کروایا جائے۔ نعیم الحق نے آکھیا کہ آن والے دو توں تن دناں وچ شہباز شریف خلاف سپریم کورٹ وچ ریفرنس جمع کراواں گے۔ اوہناں دا کہنا سی کہ سی ٹرسٹ ڈیڈ تے قطری شہزادے دا خط فراڈ اے۔
