(پاکستان پوائنٹ نیوز09۔جنوری2017ء) ملک بھر توں پچھلے ہفتے چار پڑھے لکھے تے اعلا تعلیم یافتا نوجوان لاپتا ہو گئے نیں۔ تفصیل دے مطابق ملک دے مختلف شہراںو چوں پچھلے ہفتے چار نوجوان لاپتا ہوئے نیں۔ این جی اوز، رشتے داراں تے ہور کارکناں نے خبر رساں ایجنسی نوں دَسدے ہوئے اپنے تحفظات دا وکھالا وی کیتا۔ لاپتا کارکناں نوں سماجی رابطے دی ویب سائٹ فیس بک اُتے وی ڈاڈھا جانیا پچھانیا جاندا سی۔
سائبر سکیورٹی این جی او دے مطابق وقاص گورایا تے عاصم سعید چار جنوری جدکہ سلمان حیدر 6جنوری تے احمد رضا نصیر 7جنوری نوں لاپتا ہوئے۔ وزارت داخلا دا کہنا اے کہ سلمان حیدر، جہناں نوں بلوچستان وچ جبری گمشدگیاں اُتے آواز چُکن بارے وی جانا پچھانیا جاندا اے، دے لاپتا ہون دیاں تحقیقات کیتیاں جان گیاں۔ گواچے بندے سماجی رابطے دی ویب سائٹس اُتے بنے مختلف گروپاں دا حصہ وی سن، لاہور دے علاقے کیولری گراﺅنڈ توں عاصم سعید نوں دن دیہاڑے اوہناں دے گھروں غائب کیتا گیا، عاصم سعید دے قریبی وسیلیاں دے مطابق 5توں سَت کالے رنگ دیاں گڈیاں وچ سول کپڑے پائے اہلکاراں نے اپنے آپ نوں ایف آئی اے دا اہلکار ظاہر کیتا تے عاصم سعید دے گھر اُتے دھاوا بول دِتا۔
اوہناں نے عاصم دا لیپ ٹاپ کمپیوٹر، اوہناں دے والد دا لیپ ٹاپ تے عاصم سعید دے موبائل فون وی اپنے قبضے وچ لے لئے۔ ایس واردات دے بعد عاصم سعید دے ماں پیو تے گھر والیاں مختلف ادارے جہناں وچ پولیس، ایف آئی اے تے ہور حساس ادارے شامل نیں ، اوہناں دے چکر لائے پر ہر ادارے نے عاصم سعید دی موجودگی یاں اوہناں دی گرفتاری توں لاتعلقی دا اوکھالا کیتا۔
یاد رہوے کہ عاصم سعید سنگاپور وچ اک فارما سوٹیکل فرم وچ بہت اہم تے حساس عہدے اُتے فائز نیں ،اوہ چھٹیاں وچ اپنے گھر والیاں نال ملن پاکستان آئے ہوئے سن۔ اک رپورٹ دے مطابق پاکستان نوں پرچاکاراں لئی سبھ توں خطرناک تے غیر محفوظ ملک مِتھیا گیا اے جدکہ اک ویلا سی کہ فوج اُتے تنقید کرن والے پرچا کاراں تے رپورٹرز نوں وی ماریا جاندا سی۔ حملے وچ بچ جان والے اک سرگرم لکھاری تے تجزیا کار رضا رومی، جہناں نے حملے دے بعد 2014وچ ای پاکستان چھڈ دِتا سی نے آکھیا کہ میڈیا اُتے حکومت دا کنٹرول اے۔
دوجے پاسے ملک بھر وچ لاپتے ہون والے بندیاں دے معاملے وچ سکیورٹی وسیلیاں نے انٹیلی جنس مداخلت نوں رَد کیتا اے۔ احمد رضا نصیر دے بھرا نے خبر ایجنسی نوں دسیا کہ احمد رضا پولیو دا شکار اے جہنوں اُتلے پنجاب وچ اک خاندانی دُکان توں غائب کیتا گیا۔ سلمان حیدر دے لاپتا ہون دے کجھ گھنٹیاں بعد اوہناں دی بیوی نوں اک پیغام ملیا جہدے وچ آکھیا گیا سی کہ میری گڈی اسلام آباد رایکسپریس وے اُتے کھلوتی اے ، جہدے تھوڑی ای دیر بعد پولیس نے سلمان حیدر دی گڈی برآمد کر کے اوہناں دے لاپتا ہون دی رپورٹ درج کرائی۔
سلمان حیدر دے بھرا فیضان دا کہنا سی کہ میرے بھرا نوں کدی دھمکیاں نہیں ملیاں۔ لاپتا ہون والے ایہناں کارکناں وچوں کسے نے وی کدی عدالت دا ساہمنا نہیں کیتا تے نہ ای اوہناں اُتے کسے قسم دا کوئی الزام سی۔
