اسلام آباد(پاکستان پوائنٹ نیوز05۔جنوری2017ء) سپریم کورٹ کورٹ وچ پاناما کیس بارے درخاستاںدی سنوائی ہوئی۔ سنوائی دوران وزیر اعظم نواز شریف دے وکیل نے اوہناں دے عوامی دور دیاں تفصیلاں جمع کروائیاں۔ سنوائی دوران پی ٹی آئی دے وکیل نعیم بخاری نے قطری شہزادے دے خط تے وزیراعظم دے بالاں دے بیاناں وچ تضاد اُتے گل کیتی۔ عمران خان سنوائی دوران نعیم بخاری نوں ہدایت کیتی کہ اوہ مریم دے بینفیشنل ہون اُتے گل کرن۔
نعیم بخاری نے آکھیا کہ لندن فلیٹ توںکوئی آمدن نہیں ملدی فلیٹس لئی پیسے والد نے اولد نوں دِتے۔ جسٹس اعجاز افضل نے آکھیا کہ جے مریم نواز اینی قیمتی جائیداد دی مالک نیں تے فیر اپنے والد دی کفالت ہیٹھ کیویں نیں؟ نعیم بخاری نے دسیا کہ مریم نواز نہ سکول دی فیس بھردیاں نیں نہ بجلی دے بل۔ جسٹس اعجاز افضل نے استفسار پُچھیا کیہ تُسیں ایہ آکھ رہے اوہ کہ مریم نواز بنیفیشل نیں تے فیر مریم نواز کفالت ہیٹھ کیویں ہوئیاں؟ جہدے اُتے نعیم بخاری نے آکھیا کہ ایہو تے میرا کیس اے کہ مریم نواز کفالت ہیٹھ وی نیں تے بنیفیشل وی۔
جسٹس کھوسہ نے آکھیا کہ جے مریم نواز بنیفیشنل وی نیں تے کفالت ہیٹھ وی تے فیر پوری جائیداد شریف خاندان دی ہوئی؟نعیم بخاری نے عدالت نوں دسیا کہ لندن فلیٹس نوں رہائشی مقصداں لئی ورتیا جا رہیا اے، مریم دا ویاہ توں پہلے یاں بعد وچ کوئی آمدنی دا وسیلا نہیں سی۔ جسٹس کھوسہ نے آکھیا کہ کل ہیڈ لائنز چل رہیاں ہون گیاں کہ بخاری صاحب دا کیس فارغ ہو گیا۔
جسٹس عظمت سعید نے نعیم بخاری نوں ہدایت کیتی کہ اوہ پہلے مریم نواز دے بینیفیشل تے کفالت ہیٹھ ہون اُتے دلائل دین۔ نعیم بخاری نے آکھیا کہ مریم دی آمدن نہیں پر فلیٹس اوہناں دی ملکیت نیں۔ جہدے اُتے جسٹس اعجاز نے آکھیا کہ تُسیں آکھ رہے اوہ کہ کروڑاں رُپئے دی جائیداد دا مالک بندا کفالت ہیٹھ اے۔ جے انج اے تے ایہ کیویں ممکن اے، تہاڈا کیس تے فیر فارغ اے، ہوا وچ قلعے نہ بناﺅ۔
جسٹس اعجاز نے پُچھیا کہ قانون تے عوامی نمائندگی ایکٹ وچ کفالت ہیٹھ ہون دی کیہ تعریف اے؟ تہاڈے دلائل دا سارے ڈھانچا ہوا وچ قلعے بنان دے برابر اے۔ جسٹس آصف نے آکھیا کہ لگ رہیا اے کہ جو ہیڈ لان لگے گی اوہدے وچ آکھیا جائے گا کہ تُسیں فارغ او۔ نعیم بخاری نے ہسدے ہوئے پُچھیا کہ ایہ بنچ دا سانجھا فیصلا اے؟ جسٹس آصف سعید کھوسہ نے آکھیا کہ اسیں جلدی وچ نہیں آں۔ کیس دے ہر پہلو نوں سُناں گے۔ جسٹس آصف نے آکھیا کہ آن والے ہفتے توں لارجر بنچ سارا دن ایہو مقدما سُنے گا۔ جہدے بعد کیس دی سنوائی سنوائی کل تیکر ملتوی کر دِتی۔
