اسلام آباد(پاکستان پوائنٹ نیوز03۔جنوری2017ء) سندھ سرکار نے پاک چین اقتصادی راہداری منصوبے دی سکیورٹی لئی اُچیچی فورس بنان دا فیصلا کیتا اے، فیصلا کراچی وچ اعلا سیاسی و فوجی قیادت دے اک اجلاس وچ کیتاگیا۔ اجلاس وچ سی پیک سنے ملک دی مجموعی سکیورٹی صورتحال داوی جائزا لِتا گیا۔تفصیل دے مطابق صوبائی مثیر مولابخش چانڈیو نے اجلاس دے بعد پرچا کاراں نال گل بات کردے ہوئے آکھیا کہ کراچی سنے سندھ دے کئی حصیاں وچ پاک چین اقتصادی راہداری منصوبے لئی اہم پراجیکٹ تعمیر ہیٹھ نیں، پچھلے ہفتے چینی حکام نے کراچی وچ ریلوے دا منصوبا شامل کرن اُتے وی رضا مندی دا وکھالا کیتا سی جدکہ کراچی دے نیڑے ضلع ٹھٹھہ وچ اک بندرگاہ دی ترقی تے اُچیچی اقتصادی زون دی اُساری وی ایہناں منصوبیاں وچ شامل اے۔
اوہناں دا کہنا سی کہ ایہناں منصوبیاں اُتے رضا مندی سی پیک بارے پجنگ وچ ہون والے سانجھے تعاون دی کمیٹی دے اجلاس وچ طے ہوئی سی جہدے وچ سندھ دے وزیر اعلا سید مراد علی شاہ نے اپنے سرکاری وفد سنے رلت کیتی سی۔ اوہناں دا کہنا سی کہ کراچی وچ پچھلے دیہاڑے ہون والے اجلاس وچ پاک فوج دے اک ہزار ریٹائرڈ فوجیاں اُتے مشتمل اُچیچی فورس بنان دا فیصلا کیتا گیا اے۔ فورس بنان دا مقصد سی پیک منصوبے دی سکیورٹی نوں یقینی بنانا اے۔
