اسلام آباد(پاکستان پوائنٹ نیوز03۔جنوری2017ء) چینی صدر سی چن پنگ نے پاکستان نال دو پاسی تعلقات نوں نویاں بلندیاں اُتے لیجان دی خاہش دا وکھالا کیتا اے۔ چینی صدر نے ایہناں خیالاں دا اظہار پاکستان دے صدر ممنون حسین نوں اوہناں دی سالگرھا دے موقعے اُتے اپنے اک پیغام وچ کیتا۔ چین دے صدر نے آکھیا کہ اوہ چین تے پاکستان وچکار دو پاسی تعلقات دی مسلسل پیشرفت نوں اگانہ ودھان لئی صدر ممنون حسین نال رلکے کم کرن اُتے راضی نیں۔
ایہ گل منگل نوں ایوان صدر ولوں جاری کیتے جان والے اک اعلامیے وچ دَسی گئی اے۔ چینی صدر ولوں پچھلے ورھے جون دے مہینے وچ تاشقند وچ شنگھائی تعاون تنظیم دے سربراہی اجلاس وچ صدر ممنون حسین نال اپنی دوستانا تے تفصیلی گل بات دا وی ذکر کیتا۔ دوجے پاسے صدر ممنون حسین نے صدر شی ولوں محبت دے اظہار دا جواب دیندے ہوئے اوہناں دا شکریا ادا کیتا۔ صدر ممنون حسین نے آکھیا کہ اوہ پاک چین تعلقات نوں ہور پکےاں بنان وچ اپنے چینی ہم منصب دی ذاتی دلچسپی دی قدر کردے نیں۔
صدر ممنون حسین نے آکھیا کہ پاکستان چین نال دوستی نوں ڈاڈھی اہمیت دیندا اے۔ اوہناں نے ہور آکھیا کہ دوویں ملک نہ صرف اعتماد والے دوست نیں بلکہ دفاعی شراکت دار وی نیں۔ اوہناں نے چینی لوکائی دی خشحالی تے چینی صدر لئی چنگیاں خاہشاں دا وکھالا وی کیتا۔
