حکومت حادثیاں توں بچن لئی پی آئی اے نال رلکے اقدامات کرے: نیہا جنید دی ماں دا مطالبا

لاہور(پاکستان پوائنٹ نیوز02۔جنوری2017ء) جنید جمشید دی بیوی نیہا جنید وی حویلیاں دُکھانت وچ شہید ہو گئی سی۔ تفصیل دے مطابق لاہور وچ اپنے گھر اندر نیہا جنید دی ماں کرنل (ر) ڈاکٹر یاسمین نے پہلی وار میڈیا نال گل بات کردے ہوئے آکھیا کہ نیہا، جنید جمشید نال چترال تبلیغ لئی موجود سی ۔ ڈاکٹر یاسمین نے دسیا کہ نیہا نے میرے نال آخری وار گل کیتی تے آکھیا کہ اوہ دو دناں تیکر واپس آ جائے گی، اوہنے دسیا کہ چترال وچ ٹھنڈا بہت اے تے اسیں تبلیغ دا کم ختم ہوندے ای جلدی واپس آ جاواں گے۔ ڈاکٹر یاسمین نے دسیا کہ نیہا نے مڈھلی تعلیم سٹی سکول توں حاصل کیتی، کنیئرڈ کالج توں گریجویشن کرن دے بعد ایم بی اے پنجاب یونیورسٹی توں کیتا۔ اوہناں نے دسیا کہ نیہا نے کدی پُتر دی کمی محسوس نہیں ہون دِتی۔ اوہناںد ا کہنا سی کہ نیہا بہتیاں گلاں نہیں کردی سی پر فٹبال دی چنگی کھڈارن سی اوہنے ہمیشہ ای سوانیاں نوں بااختیار کرن دے حوالے نال گل کیتی۔ نیہادی والدہ نے مطالبا کیتا کہ حکومت پی آئی اے نال رلکے ، ایس طرحاں دے حادثیاں توں بچن لئی اقدامات کرے۔اوہناں دا ہور کہنا سی کہ پی آئی اے نوں اپنے بیڑے وچ جدید جہاز شامل کرنے چاہیدے۔