اسلام آباد(پاکستان پوائنٹ نیوز29۔دسمبر2016ء) پاناما لیکس کیس دی سپریم کورٹ وچ سنوائی روکن لئی سپریم کورٹ رجسٹری وچ درخاست دائر کر دِتی گئی اے۔ تفصیل دے مطابق درخاست وطن پارٹی دے بیرسٹر ظفر اللہ ولوں جمع کروائی گئی اے، درخاست گزار نے موقف اختیار کیتا اے کہ پاناما پیپرز وچ وزیر اعظم دا ناں نہیں اے، سیاسی فائدے لئی عدالت دے موڈھے دا سہارا لِتا جا رہیا اے۔
درخاست گزار دا کہنا اے کہ سستی شہرت حاصل کرن لئی معاملا عدالت وچ لیاندا گیا جدکہ پاناما دا معاملا سیاسی تے ذاتی نوعیت دا اے۔ بیرسٹر ظفر دا کہنا اے کہ پارلیمنٹ وچ کارروائی شروع ہو گئی اے، ایف بی آر نے وی پاناما لیکس کیس وچ مِتھے گئے بندیاں نوں نوٹس جاری کیتے۔ درخاست گزار نے ہور آکھیا کہ انکوائری کمیشن دا قانون پرانا ہو گیا اے ایس لئی معاملے اُتے کمیشن نہیں بنایا جا سکدا۔ درخاست گزار نے سپریم کورٹ وچ پاناما کیس دی سنوائی روکن دی درخاست وی کیتی تے آکھیا کہ پاناما لیکس بارے ساریاں درخاستاں نوں رَد کیتا جائے۔ یاد رہوے کہ سپریم کورٹ وچ پاناما لیکس کیس دی سنوائی جاری اے جدکہ کیس دی ہور سنوائی آن والے ورھے جنوری دے پہلے ہفتے تیکر ملتوی کیتی گئی اے۔
