اسلام آباد(پاکستان پوائنٹ نیوز26۔دسمبر2016ء) الیکشن کمیشن وچ پی ٹی آئی چیئرمین عمران خان خلاف نااہلی ریفرنس دی سنوائی کل تیکر ملتوی کر دِتی گئی اے، کل سنوائی دوران طلال چودھری دے وکیل اکرم شیخ ریفرنس دے سنوائی جوگ ہون یاں نہ ہون بارے دلائل دین گے۔ تفصیل دے مطابق الیکشن کمیشن وچ عمران خان خلاف نااہلی ریفرنس دی سنوائی ہوئی۔ عمران خان خلاف نااہلی ریفرنس (ن) لیگی رہنما طلال چودھری نے الیکشن کمیشن وچ دائر کیتا ہویا اے۔
ریفرنس دی سنوائی چیف الیکشن کمشنر سردار رضا دی سربراہی وچ چار رکنی بنچ نے کیتی۔ سنوائی دوران طلال چودھری دے وکیل اکرم شیخ دا کہنا سی کہ ایشو فریم کیتے بغیر کیس دی کارروائی اگے نہیں ٹُر سکدی۔ سپریم کورٹ کئی فیصلیاں وچ آکھ چکی اے کہ الیکشن کمیشن ایشوز فریم کرے۔ اکرم شیخ نے آکھیا کہ الیکشن کمیشن صرف جواب لے کے نہ دلائل لے سکدا اے تے نہ ای فیصلا سُنا سکدا اے۔
اوہناں نے آکھیا کہ عمران خان دا جواب رام کہانی اے۔ اکرم شیخ نے آکھیا کہ آرٹیکل 62.63دی خلاف ورزی تے غلط ڈکلیئریشن اُتے الیکشن کمیشن نااہل کر سکدا اے۔ چیف الیکشن کمشنر نے آکھیا کہ اک موقف ایہ وی اے کہ معاملا پہلے سیشن جج نوں گھلیا جائے، چیف الیکشن کمشنر نے آکھیا کہ سیشن جج ٹرائل کرے تے اوہدی رپورٹ اُتے کمیشن فیصلا دیوے۔ دوجاموقف ایہ اے کہ الیکشن کمیشن اپنے آپ صادق تے امین دا فیصلا کرے۔
اوہناں نے آکھیا کہ اج سپیکر ریفرنسز اُتے سنوائی ہو رہی اے، اج ہون والے کیسز تے محفوظ کیتے گئے کیسز دی نوعیت وچ فرق اے، سپریم کورٹ وچ معاملا سنوائی ہیٹھ ہون پاروں فیصلا محفوظ کیتا گیا، جہڑے مقدمیاں وچ فیصلا محفوظ کیتا گیا اوہ پٹیشنز نااہلی لئی دائر کیتیاں گئیاں سن۔ سنوائی دے دوران اکرم شیخ دا کہنا سی کہ عمران خان تے جہانگیر ترین خلاف کیسز نوں اکٹھا کیتا جائے۔
اکرم شیخ نے آکھیا کہ تہانوں ایس توں پہلے وی دو وار ایشو فریم کرن دا آکھیا گیا اے جہدے اُتے چیف الیکشن کمشنر نے آکھیا کہ مینوں نہیں یاد کہ پہلے کدی ایہدے اُتے گل ہوئی ہوئے۔ اکرم شیخ نے آکھیا کہ تہاڈا دائرا اختیار چیلنج ہویا وی تے اسیں عدالت دی مدد کراں گے۔ عمران خان دے وکیل نعیم بخاری نے آکھیاکہ ریفرنس دادفاع سپیکر قومی اسمبلی نوں آپ کرنا چاہیدا، اوہناں نے آکھیا کہ سپیکر نوں نااہلی دی درخاست دین والے ارکان کمیشن وچ ریفرنس دا دفاع نہیں کر سکدے۔
الیکشن کمیشن وچ ریفرنس سپیکر نے دائر کیتا، ایس لئی رکن دا ہن ایہدے نال تعلق نہیں۔ نعیم بخاری نے آکھیا کہ کمیشن وچ صرف الیکشن دے بعد دے اقدامات اُتے اہلیت نوں چیلنج کیتا جا سکدا اے، الیکشن توں پہلے کسے معاملے اُتے انتخابات دے بعد کمیشن نوں کارروائی دا اختیار نہیں اے۔نعیم بخاری نے ہور آکھیا کہ بنی گالا دی زمین 2003وچ مُل لِتی گئی سی، ریفرنس وچ کسے شق دی خلاف ورزی دا ذکر نہیں اے۔
میاں بیوی وچکار ہون والے معاملے اُتے ریفرنس دائر کیتا گیا۔ اوہناں دا کہنا سی کہ الیکشن ویلے زمین دا معاملا نہیں چُکیا گیا، نعیم بخاری نے آکھیا کہ سپیکر ایاز صادق معتصب نیں۔ عمران خان نے ایاز صادق دے مقابلے وچ الیکشن لڑیا، الیکشن لڑنا دشمنی دی وجہ بن جاندا اے۔ اوہناں نے آکھیا کہ سپیکر نے وزیر اعظم خلاف پی ٹی آئی دا ریفرنس رَد کیتا، جہدے اُتے چیف الیکشن کمشنر نے آکھیا کہ الیکشن لڑنا تعصب نہیں ہوندا، ہر سپیکر کسے خلاف الیکشن لڑ سکدا اے، کیہ تعصب دی بنیاد اُتے سپیکر ریفرنس رَد کر سکدا اے؟ جواب وچ نعیم بخاری نے آکھیا کہ سپریم کورٹ وچ وی ایس طرحاں دا ای معاملا سنوائی ہیٹھ اے۔
اوہی نکات سپریم کورٹ وچ سنوائی ہیٹھ نیں جدکہ الیکشن کمشنر نے کیس دی ہور سنوائی نوں کل تیکر ملتوی کر دِتا اے۔سنوائی دوران طلال چودھری دے وکیل اکرم شیخ ایس ریفرنس دے سنوائی جوگ ہون یاں نہ ہون بارے اپنے دلائل دین گے۔
