لاہور(پاکستان پوائنٹ نیوز17۔دسمبر2016ء) پی ٹی آئی چیئرمین عمران خان نے لاہور وچ نمل یونیورسٹی دی کانووکیشن دی تقریب وچ رلت کیتی۔ تقریب وچ عمران خان نے پڑھیاراں نوں ڈگریاں وی دِتیاں۔ تفصیل دے مطابق نمل یونیورسٹی وچ کانووکیشن دی تقریب نال خطاب کردے ہوئے عمران خان دا کہنا سی کہ ماں پیو لئی اج خشی دا دن اے اوہناں نوں مبارک ہووے۔ اوہناں نے آکھیا کہ بالاں دی تعلیم وچ ماں پیو دی دلچسپی ضروری اے، ماں پیو جنی دلچسپی لین گے، بال اونا ای اگانہ جان گے۔
اوہناں دا کہنا سی کہ سانوں اپنے ملک وچ قوماں اُتے سرمایا کاری دی لوڑ اے، آکسفورڈ سنے انگلینڈ دے دو اداریاں نے زندگی دے ہر شعبے وچ اہم لوک دِتے نیں۔ میری خاہش اے کہ نمل یونیورسٹی وچ پڑھیار باہروں پڑھن آن۔ نمل یونیورسٹی آکسفورڈ لیول دا تعلیمی ادارا اے، اگانہ جا کے نمل یونیورسٹی پاکستان دا ایجوکیشن تے نالج سینٹر بنی گی، میں وی سیاسی معاملات توں فارغ ہون دے بعد آ کے ایہدے اُتے پورا زر لاواں گا۔
عمران خان دا کہنا سی کہ قوماں تے ملک سڑکاں تے پل بنان نال نہیں بلکہ نسلاں اُتے خرچ کرن تے سرمایا کاری کرن نال بندیاں نیں۔ اوہناں دا کہنا سی کہ آزادی ملن دے بعد قوم اُتے کوئی سرمایا کاری نہیں کیتی گئی، ساڈے ڈھائی کروڑ بال سکول نہیں جاندے، سکول پیسے بنان دیاں دُکاناں بن گئے نیں پر ایہ بدقسمتی اے کہ اسیں ہن وی اورنج لائن ٹرین ورگے منصوبے بنا رہے آں۔
اوہناں دا کہنا سی کہ سنگاپور تے پاکستان 60دی دہاکے وچ اِکو جہے ملک سن پر ہن اوس نکے جزیرے دیاں برآمدات پاکستان توں کیتے زیادا نیں۔ اوہناں نے دسیا کہ پاکستان فی کس آمدن وچ سنگاپور توں وی پچھانہ رہ گیا اے۔ کامیاب ہون والے پڑھیاراں نوں مخاطب کردے ہوئے اوہناں نے آکھیا کہ زندگی لنگھان نوں سارے دو طرحاں ویکھدے نیں پر میں ایہ آکھاں گا کہ تُسیں جدوں وی خاب پِچھے جانا چاہوں تے ہمیشہ اپنے آپ اُتے اعتماد رکھو۔ اوہناں دا کہنا سی کہ ہارن توں ڈرن دی بجائے خوف اُتے قابو پانا سکھو کیوں جے کامیاب ہمیشہ اوہی ہوندے نیں جو ہارن توں نہیں ڈردے۔ اوہناں دا کہنا سی کہ جو ہار توں ڈردا اے اوہنوں کدی جِتنا نہیں آﺅندا۔
