اسلام آباد(پاکستان پوائنٹ نیوز16۔دسمبر2016ء) سی پیک نال آن والے دو ورھیاں دے دوران 23لکھ 20ہزار بندیاں نوں روزگار ملے گا جہدے نتیجے وچ بے روزگاری دی شرح نوں گھٹ کرن وچ مدد ملے گی۔تفصیل دے مطابق چیف کانومسٹ پاکستان ڈاکٹر ندیم جاوید نے آکھیا اے کہ سال 2017-18دے دوران بے روزگاری دی شرح وچ 2.32ملین کمی ہووے گی۔ اوہناں نے آکھیا کہ جولائی 2017تیکر ملک وچ توانائی دی منگ تے رسد وچکار موجود فرق ختم ہو جاوے گا کیوں جے سی پیک بنیادی طور اُتے جنوبی ایشیاءدے ملکاں دے سانجھے رابطیاں دا پروگرام اے جہدے تحت توانائی دے مسئلے اُتے قابو پایاجائے گا۔
اوہناں نے آکھیا کہ 2018تیکر ملک وچ بجلی دی پیداوار مقامی لوڑاں توں ودھن دی امید اے۔ ڈاکٹر ندیم جاوید نے آکھیا کہ سی پیک دے مکمل ہون نال نہ صرف پاکستان دی اقتصادی ترقی نوں ودھوتری ملے گی بلکہ ایس خطے دے ہور ملکاں دیاں تجارتی سرگرمیاں وچ وی وادھا ہووے گا تے غربت دے خاتمے وچ مدد ملے گی۔
