اسلام آباد(پاکستان پوائنٹ نیوز08۔دسمبر2016ء) پچھلے دیہاڑے حادثے دا شکار ہون والے بدقسمت جہاز وچ مشہور مبلغ تے نعت خواں جنید جمشید وی اپنی بیوی نال موجود سن۔ پچھلے دیہاڑے میڈیا اُتے آن والیاں خبراں دے مطابق جنید جمشید دے نال اوہناں دی دوجی بیوی نیہا موجود سن پر اج سویرے قومی اخبار وچ چھپن والی اک خبر دے مطابق جنید جمشید دے نال اوہناں دی تیجی بیوی موجود سی۔
اخبار دی رپورٹ دے مطابق جنید جمشید پہلے گلوکاری وچ اپنا ناں پیدا کر چکے سن پر بعد وچ دین ول آن اُتے اوہ مشہور مبلغ تے بہترین آواز والے نعت خواں وی بن گئے۔ جنید جمشید نے تن ویاہ کیتے سن۔ پچھلے دیہاڑے میڈیا وچ آن والیاں خبراں وچ دسیا جا رہیا سی کہ جنید جمشید دے نال شہید ہون والی اوہناں دی دوجی بیوی سی پر ہُن ایہ انکشاف ہویا کہ جنید جمشید دیاں تن بیویاں سن۔
جنید جمشید دی پہلی بیوی عائشہ جنید وچوں اوہناں دے تن پُتر تے اک دھی اے، دوجی بیوی دا تعلق اسلام آباد تے حادثے وچ ہلاک ہون والی بیوی دا تعلق لاہور توں سی۔ جنید جمشید پاکستان وچ ای نہیں بلکہ دنیا بھر وچ وی مشہور سن تے اوہناں دا ناں دنیا دے 500بااثر بندیاں دی لسٹ وی شامل کیتا گیا سی۔ایہو نہیں جنید جمشید نے جنوبی پنجاب وچ خون دے روگ وچ مبتلا بالاں لئی بہت ساریاں خدمتاں انجام دِتیاں۔
ملتان وچ اوہناں نے کئی وار تعلیمی اداریاں وچ ہون والیاں تقریباں وچ رلت کیتی تے نوجواناں نوں خون دین دی اپیل وی کیتی، اوہ آپ وی خون دیندے سن۔ اوہناں نے آن والے ورھے جنوبی پنجاب دے بالاں لئی ناروے تے بیلجیئم وچ تقریباں کرنیاں سن۔ ملتان دی صنعتکار فیملی مختار دی بھین فادیہ، جنید جمشید دی مونہ بولی بھین سی تے اوہ جنید جمشید نال سماجی خدمتاں انجام دیندیاں سن۔
رپورٹ دے مطابق جنید جمشید نے 13وار حج کیتا، جنید جمشید نے گلوکاری چھڈ کے اللہ دی راہ دا چناﺅ کیتا تے مبلغ تے نعت خواں بن گئے۔ اوہناںد ے یار بیلیاں دا کہنا اے کہ جنید جمشید جدوں وی نعت پڑھدا سی تے سرور جہیا آ جاندی سی۔ جنید جمشید آکھدے سن کہ میں بطور پاپ سنگر بھریا مجمع چھڈ دِتا سی پر اللہ نے میرے اُتے مہربانی کیتی، میں جدوں وی مذہبی لیکچر لئی کِدھرے وی جانا واں تے اوسے طرحاں مجمع اکٹھا ہو جاندا اے تے لوک توجہ نال اللہ دا ذکر سُندے نیں۔ اوہ اکثر آکھدے سن کہ اللہ نے مینوں گلوکاری توں زیادا تبلیغ وچ کامیابی بخشی اے جہدے لئی میں اللہ دا بے حد شکر گزار آں۔
