اسلام آباد(پاکستان پوائنٹ نیوز08۔دسمبر2016ء) ترجمان دفتر خارجا نفیس زکریا دا کہنا اے کہ پی آئی اے دے جہاز حادثے اُتے پوری قوم دُکھ وچ اے، اوہناں نے دسیا کہ امریکا نے پی آئی اے جہاز حادثے دیاں تحقیقات وچ تعاون دی پیشکش کیتی اے۔ دفتر خارجا نے بریفنگ دے شروع وچ جہاز حادثے وچ ہلاک ہون والیاں لئی دعا کی۔ تفصیل دے مطابق میڈیا نوں ہفتہ وار بریفنگ دیندے ہوئے ترجمان دفتر خارجا نفیس زکریا نے آکھیا کہ پاکستان خطے وچ ہتھیاراں دی دوڑ نہیں چاہندا۔
اوہناں نے آکھیا کہ پاکستان نے ہارٹ آف ایشیا کانفرنس وچ رلت کیتی، بھارت وچ پاکستان دے میڈیا نال مَندا سلوک کیتا گیا۔ بھارت دے منفی سلوک دا مطلب اجلاس دی اصل روح توں توجہ ہٹانا سی۔ بھارت دے رویہ نوں کانفرنس وچ موجود کسے وی ملک نے نہیں سلاہیا۔ اوہناں نے آکھیا کہ کشمیر وچ بھارتی ظلماں تے انسانی حقاں دیاں خلاف ورزیاں جاری نیں، بھارت دا بنیادی مقصد مقبوضا کشمیر وچ جاری ظلماں اُتے پردا پانا سی۔
اوہناں نے آکھیا کہ اسیں کشمیری قوم دے حوصلے نوں سلام کردے آں۔ ترجمان دا کہنا سی کہ اسیں بھارتی ظلماں دی مذمت کردے آں، مقبوضہ کشمیر وچ حریت قیادت دا اکٹھ مثالی اے۔ بھارت نے کانفرنس دا ماحول خراب کرن دی کوشش کیتی جہدا منفی تاثر اُبھریا۔ ترجمان نے آکھیا کہ افغان صدر اشرف غنی دے بیان اُتے تبصرا مناسب نہیں اے۔ مشیر خارجا سرتاج عزیز ایہدے اُتے تبصرا کر چکے نیں۔ اوہناں دا کہنا سی کہ پاکستان نے مشکل ترین حالات وچ وی افغانیاں نوں پناہ دِتی۔
