اسلام آباد(پاکستان پوائنٹ نیوز07۔دسمبر2016ء) سپریم کورٹ وچ پاناما کیس دی سنوائی جاری اے سنوائی دوران وزیر اعظم دے وکیل سلمان بٹ نے عدالت وچ آکھیا کہ جدوں وزیر اعظم دے بال پڑھ رہے سن اوس ویلے دا ریکارڈ کتھوں لیائیے؟ اوہناں نے آکھیا کہ پاناما پیپرز وچ وزیر اعظم دا ناں نہیں آیا۔ جہدے اُتے جسٹس کھوسہ نے آکھیا کہ ایہ سارے معاملات گرینڈ سن تے گرینڈ فادر وچکار سن ، تُسیں تقریراں وچ آکھیا سی کہ ہر شے دا ریکارڈ موجود اے تے پیش کر دِتا جائے گا۔
چیف جسٹس نے آکھیا کہ عدالت وچ قانون دے بغیر فیصلا نہیں کردے، ایہ بہت چنگا دفاع اے کہ ابا جی نے ایہ آکھیا تے سانوں نہیں پتا۔ جسٹس امیر ہانی مسلم نے آکھیا کہ تُسیں آکھو کہ مینوں پتا نہیں ادائیگی کتھوں ہوئی؟ جسٹس کھوسہ نے آکھیا کہ تہانوں کہنا چاہیدا سی کہ سارے معاملات دادے تے پوترے وچکار نیں، اوہناں دا کہنا سی کہ اسیں مَندے آں کہ ساری زندگی دے خرچیاں دے ریکارڈ نہیں رکھے جا سکدے۔
سلمان بٹ نے آکھیا کہ قطری شہزادے دے خاندان نال معاملا کیویں شروع تے طے ہویا پتا نہیں، جہدے اُتے جسٹس کھوسہ نے آکھیاکہ فیر تُسیں آکھ دیو کہ وضاحت نہیں کر سکدے۔ جہدے اُتے سلمان بٹ نے آکھیا کہ 40ورھے پرانا ریکارڈ لبھنا مشکل اے۔ جسٹس کھوسہ نے آکھیا کہ تُسیں 1980دے بعد توں بارھاں ملین درہم توں گل شروع کرو۔ سلمان بٹ نے آکھیاکہ 5اپریل تے 22مئی نوں وزیر اعظم نواز شریف نے تقریراں کیتیاں۔
جسٹس اعجاز الاحسن نے آکھیا کہ وزیر اعظم نواز شریف نے تقریراں وچ قطری خط دا ذکر نہیں کیتا، سلمان بٹ نے آکھیاکہ وزیر اعظم نے اپنی تقریر وچ آکھیا سی کہ ریکارڈ موجود اے اوہ پیش کیتا جا سکدا اے۔ بی سی سی آئی بنک نال 1978وچ 21ملین ڈالر دا معاملا طے ہویا سی۔ جسٹس اعجاز نے آکھیا کہ مشکل گل ایہ اے کہ قطر وچ پیسےاں دی منتقلی تے سرمایا کاری دا کوئی ریکارڈ موجود نہیں اے۔
جسٹس آصف سعید نے آکھیاکہ وزیر اعظم ساڈے وی وزیر اعظم نیں، سلمان بٹ نے عدالت نوں دسیا کہ 1999وچ گرفتار کر کے عدالت نے سارا ریکارڈ قبضے وچ لے لیا۔ ہائی کورٹ وچ رٹ دائر کیتی جہدا فیصلا 2012وچ ہویا۔ سلمان بٹ دا کہنا سی کہ کمپنیاں دا ریکارڈ اجے تیکر نہیں مل سکیا۔ ہائی کورٹ نے ایہدے اُتے نیب نوں جرمانا وی کیتا۔ وزیر اعظم نے آکھیاکہ مکہ وچ کارخانا لایاجو جدہ دی فیکٹری بارے اے۔
جسٹس امیر ہانی مسلم نے آکھیا کہ فریق عدالت وچ گھٹ تے میڈیا وچ زیادا بولدے نیں۔ جسٹس عظمت سعید نے آکھیاکہ فریق جو عدالت وچ بولدے نیں اوہدے توں ہٹ کے عدالتوں باہر بولدے نیں، میڈیا نوں ویکھ کے لگدا اے کہ ایس مقدمے دی نہیں کسے ہور کیس دی سنوائی اے، ٹرک دی بتی دا فیصلا میڈیا کر دیوے گا۔ جسٹس عظمت نے آکھیاکہ عدالت کول جو ریکارڈ اے عدالت اوہدا فیصلا سُنا دیوے گی۔
سلمان بٹ نے آکھیا کہ فیکٹری لئی سعودی بنک توں قرضا لِتا گیا تے بعد وچ ویچ دِتی گئی۔ جسٹس کھوسہ نے سلمان بٹ نوں آکھیا کہ اگلی لائن وی پڑھو ایہنوں شاید خطرناک سمجھ کے چھڈ دِتا اے۔ جہدے اُتے سلمان بٹ نے آکھیا کہ اگلی لائن ایہ اے کہ ایہ پیسہ حسن تے حسین نواز نے اپنے کاروبار وچ ورتیا۔ اوہناں نے آکھیاکہ شریف خاندان دے ہر کم دی ذمے واری نواز شریف اُتے نہیں عائد ہوندی۔
جسٹس اعجاز نے آکھیاکہ تُسیں چاہندے او کہ دادے پوترے وچکار ہوئی گل دا والد نوں پتا نہیں اے؟ سلمان بٹ نے جواب دِتا کہ ہو سکدا اے کہ دادے پوترے وچکار بزنس دا نواز شریف نو ں پتا نہ ہووے کیوں جے شریف ہر کم اپنی مرضی نال کردے سن۔ سپریم کورٹ وچ پاناما کیس دی سنوائی وچ وقفہ ہویا، وقفے دے بعد کیس دی سنوائی دورا شروع کیتی جائے گی۔
