اسلام آباد(پاکستان پوائنٹ نیوز01۔دسمبر2016ء) آدم شماری وچ دیر اُتے آپ نوٹس دی سپریم کورٹ وچ سنوائی ہوئی۔ تفصیل دے مطابق سنوائی چیف جسٹس انور ظہیر جمالی دی سربراہی وچ تن رکنی بنچ نے کیتی۔ چیف جسٹس دا کہنا سی کہ ساڈے کول وزیر اعظم نوں طلب کرن دے علاوا کوئی چارا نہیں۔ جسٹس امیر ہائی مسلم نے پُچھیا کہ دَسو وزیر اعظم کدوں پیش ہو سکدے نیں؟چیف جسٹس نے آکھیا کہ جمہوری نظام دا آسرا آدم شماری اُتے اے۔
جسٹس امیر ہانی مسلم دا کہنا سی کہ وزیر اعظم نوں بلاﺅ یاں آدم شماری دی حتمی تاریخ دیو، جے تاریخ نہ آئی تے وزیر اعظم آپ سپریم کورٹ آن۔ چیف جسٹس نے سنوائی دوران آکھیا کہ 7دسمبر آدم شماری دی تاریخ دِتی جائے نہیں تے وزیر اعظم آپ عدالت وچ پیش ہون۔ اوہناں نے ریمارکس دِتے کہ حکومت دی نیت ای ٹھیک نہیں اے، آدم شماری نہ کروا کے پورے ملک نال مذاق کیتا جا رہیا اے۔
ساریاں سیاسی جماعتاں نوں ایہو سٹیٹس سوٹ کردا اے۔ چیف جسٹس آف پاکستان نے آکھیا کہ آدم شماری ہووے تے فیر ای نویاں حلقیاں بندیاں ہون گیاں، آئین دے مطابق آدم شماری نہ کروائی گئی تے وزیر اعظم عدالت دے کٹہرے وچ ہون گے جدکہ تحریری طور اُتے دَسو کہ آدم شماری 15مارچ نوں شروع ہو کے 15مئی نوں ختم ہو جائے گی۔ جسٹس امیر ہائی مسلم دا کہنا سی کہ وزیر اعظم دے پیش ہوئے بغیر کم نہیں چلے گا۔
چیف جسٹس نے خفگی دا اظہار کردے ہوئے آکھیا کہ اج حکومت آکھ رہی اے فوج دے بغیر آدم شماری نہیں ہو سکدی، کل الیکشن کمیشن وی آکھے گا کہ فوج دے بغیر الیکشن نہیں ہو سکدے۔ اوہناں نے آکھیا کہ لائن آف کنٹرول اُتے لڑائی چل رہی اے، ایس طرحاں تے اپریل وچ وی آدم شماری نہیں ہو سکے گی، 1998تے اج دی آبادی وچ زمین آسمان دا فرق اے۔ اوہناں نے آکھیا کہ آدم شماری دے بغیر ہوا وچ پالیسیاں بن رہیاں نیں۔
اٹارنی جنرل دا کہنا سی کہ حکومت مارچ 2016وچ آدم شماری کروان لئی تیار سی، پر اودوں صوبیاں نے آکھیا کہ آدم شماری فوج دی نگرانی وچ کروائی جائے، اٹارنی جنرل دا کہنا سی کہ آدم شماری وچ دیر پاروں آئین دی خلاف ورزی نہیں ہوندی، ایہ حکومت دا کم نہیں ایس’مشترکہ مفادات کونسل‘ وچ صوبے وی شامل نیں۔جہدے اُتے چیف جسٹس نے آکھیا کہ وزیر اعظم آکھ دین کہ آدم شماری وچ دیر دے ذمے وار صوبے نیں، چیف جسٹس نے آکھیا کہ آدم شماری دے وڈے فائدے ہون گے۔ جسٹس ا میر ہائی مسلم نے آکھیا کہ فوج دے بغیر آدم شماری نہیں ہو سکدی تے آئین بدل دیو ۔ سپریم کورٹ نے حکم دِتا کہ آدم شماری دو مہینیاں وچ کیتی جائے، سپریم کورٹ نے حکم دِتا کہ آدم شماری بارے وزیر اعظم دے دستخطاں نال حتمی تاریخ دیو۔
