اسلام آباد(پاکستان پوائنٹ نیوز22۔نومبر۔2016ء) پاکستان تحریک انصاف دے ترجمان نعیم الحق نے آکھیا اے کہ وزیر اعظم نواز شریف سپریم کورٹ دے فیصلے توں پہلے ای مستعفی ہوجان اوہ بہت جلد عدالت عظمی توں نااہل ہوجان گے۔ ایہناں خیالاں دا اظہار اوہناں نے منگل دے دیہاڑے اسلام آباد وچ پرچا کاراں نال گل بات کردے ہوئے کیتا۔ ترجمان تحریک انصاف نے آکھیا کہ نواز شریف دیاں سچ لُکاون لئی کوششاں عروج اُتے پہنچ گئیاں نیں پر اسیں سمجھدے آں کہ فیصلا ہو گیا اے ، لندن دے وکیلاں نے دسیا کہ معاملات ہارون پاشا دے ذریعے طے ہوئے نیں۔
وزیر اعظم دا کیس کمزور اے تے بہت جلد نااہل ہوجان گے۔ نعیم الحق نے آکھیا کہ جھوٹھ بول کے مسلم لیگ دے رہنما طلال چودھری تے دانیال عزیز نویں نسل نوں گمراہ کر رہے نیں، دوویں رہنما عمران خان خلاف بھیڑی زبان استعمال تے بے بنیاد الزام لاندے نیں۔ اوہناں نے آکھیا کہ ایہ دوویں ن لیگی رہنما قومی اسمبلی وچ عوامی نمائندگی دے اہل نہیں تے اسیں ایہناں خلاف آئین دے آرٹیکل 62، 63دے تحت کارروائی کراں گے۔
تحریک انصاف دے ترجمان نے آکھیا کہ قومی اسمبلی دے سپیکر ایاز صادق نے وی سپیکر دے عہدے اُتے بے ایمانی کیتی، غیر جانبدار رہن دی بجائے شریف خاندان دی خدمت کر رہے نیں۔ پرچا کار دے اک سوال اُتے نعیم الحق نے آکھیا کہ پاناما لیکس کیس دی پیر دے دیہاڑے وکیل حامد خان نے ہور پیری کرن توں معذرت کر لئی سی، ایہناں افواہواں وچ صداقت نہیں۔
