لاہور(پاکستان پوائنٹ نیوز21۔نومبر۔2016ء) شہدائے کربلا دے چہلم دے موقعے اُتے ملک دے مختلف شہراں وچ اج موبائل فون سروس رات 10وجے تیک بند رہوے گی، لاہور وچ چہلم شہدائے کربلا دا مرکزی جلوس حویلی آصف شاہ اندرون موچی گیٹ توں برآمد ہو گیا اے، جو اپنے مِتھے روٹ توں ہوندا ہویا کربلا گامے شاہ پہنچے گا۔ پنجاب دے صوبائی دارلحکومت وچ شہدائے کربلا دے چہلم تے حضرت عثمان بن علی ہجویری دے عرس پاروں سکیورٹی دے سخت انتظامات کیتے گئے نیں۔
چہلم دے جلوس تے عرس وچ رلتی لوکاں دی حفاظت لئی چھ ہزار پولیس اہلکار تعینات کرن دے نال سی سی ٹی وی کیمریاں نال چہلم دے جلوس دی مانیٹرنگ کیتی جا رہی اے، جلوس دے روٹ تے عرس دے رستیاں اُتے 100کیمرے لائے گئے نیں جدکہ ڈی سی او آفس وچ قائم مانیٹرنگ سیل توں اوہناں دی نگرانی کیتی جا رہی اے، سکیورٹی انتظامات دے تحت داتا دربار تے کربلا گامے شاہ ول آن تے جان والے رستیاں نوں ٹریفک لئی بند کیتا گیا اے جس پاروں شہر دیاں ہور سڑکاں اُتے ٹریفک دا دباءودھن نال لوکائی نوں اوکڑاں دا وی ساہمنا اے۔
شہر وچ مقامی چھٹی اے جس پاروں شہری حکومت دے دفتر تے تعلیمی ادارے بند نیں۔ عرس وچ رلت کرن والے زائرین درگاہ دے نیڑے گڈی یاں موٹر سائیکل نہیں لے کے جا سکدے جدکہ سندھ بھر وچ شہدائے کربلا دے چہلم دے سلسلے وچ جلوس کڈھے جا رہے نیں تے ایس حوالے نال کراچی وچ موٹر سائیکل دی ڈبل سواری اُتے پابندی اے، سی ویو اُتے خلاف ورزی کرن والے 100بندیاں نوں گرفتار کر لِتا گیا۔
پولیس نے 50موٹر سائیکلاں وی قبضے وچ لے لئیاں نیں۔ایس توں وکھ کوئٹہ وچ وی شہدائے کربلا دے چہلم دے موقعے اُتے شہر وچ سکیورٹی دے سخت انتظامات کیتے گئے نیں، جلوس دے مِتھے رستیاں اُتے رکاوٹاں لا کے اوہناں نوں بند کر دِتا گیا اے۔ چہلم دے جلوس دی سکیورٹی لئی پولیس فورس دے تن ہزار 500اہلکار تعینات نیں جدکہ مِتھے روٹ اُتے سارےاں دُکاناں سیل کردِتیاں گئیاں نیں۔ ایس توں علاوا شہر دے مختلف علاقیاں وچ وی سکیورٹی اہلکار تعینات نیں، شہر تے دوالی علاقیاں وچ پٹرولنک وی جاری اے۔ کوئٹہ وچ شہدائے کربلا دے چہلم دا جلوس علمدار روڈ توں برآمد ہویا جو طوغی روڈ، سرائے نمک، مری آباد توں ہوندا ہویا بہشت زینب قبرستان جا کے ختم ہووے گا۔
