اسلام آباد(پاکستان پوائنٹ نیوز18۔نومبر۔2016ء) پاکستان نے چین دیاںد یونیورسٹیاں نوں دعوت دِتی اے کہ اوہ پاکستان وچ آ کے اپنیاں یونیورسٹیاں دے کیمپس کھولن۔ تفصیل دے مطابق وزیر مملکت برائے وفاقی تعلیم تے پیشہ ورانہ تربیت محمد بلیغ الرحمان نے چالو ہفتے ای چینی یونیورسٹیاں نوں پاکستان وچ اپنے کیمپس کھولن دی دعوت دِتی اے۔ محکما برائے پالیسی تے ضابطے دے ڈائریکٹر جنرل دی قیادت وچ چینی وفد نال اک ملاقات وچ اوہناں نے آکھیاکہ دوویں ملکاں وچکار اُستاداں تے پڑھیاراں وچکار سائنس تے ہور شعبیاں وچ ریسرچ اُتے مبنی مواد تے ہور تعاون دوویں ملکاں لئی فائدا مند ہووے گا۔
پریس ریلیز دے مطابق چینی وفد تے چینی وزارت تعلیم ولوں تعلیمی پالیسیاں بارے تحقیقات کرن آیا سی۔ ذکر کیتا گیا چینی وفد پاکستان، ایران تے ازبکستان وچ تعلیم دی عمومی صورتحال بارے تحقیقات کرنا چاہندا سی۔ وزیر مملکت نے چینی وفد نوں پاکستان وچ موجودا تعلیمی صورتحال توں آگاہ کیتا، نال ای چینی وفد نوں پاکستان وچ تعلیمی میدان وچ نویں آن والے منصوبیاں بارے وی دسیاگیا۔ ایس توں وکھ اوہناں نے تکنیکی تے پیشہ ورانہ تربیت وچ خصوصی طور اُتے چینی یونیورسٹیاں دے تعاون نوں سلاہیا۔ ایس ملاقات وچ وفاقی سیکرٹری تعلیم تے ہور اہم حکام وی رلتی سن۔
