اسلام آباد(پاکستان پوائنٹ نیوز17۔نومبر۔2016ء) ترک صدر طیب اردوان دا کہنا اے کہ میں ترکی توں پاکستان لئی محبتاں سمیٹ کے لیایا واں۔ اوہناں نے آکھیا کہ میں پہلے وی پارلیمنٹ دے سانجھے اجلاس وچ رلت کیتی سی، میرے لئی ایہناں ایس ایوان دے اجلاس وچ رلت کرنا خشی دی گل اے۔ پارلیمنٹ دے سانجھے اجلاس نال خطاب کردے ہوےءترک صدر نے آکھیا کہ ترکی تے پاکستان وچکارتعلقات بہت پرا نیں۔
اوہناںد ا کہنا سی کہ پاکستان نال محبت تے خلوص دا اظہار کرنا واں، اسیں صرف لفظاں دی حد تیک نہیں بلکہ حقیقی معنیاں وچ برادر ملک آں، دوویں ملک آپس وچ بھائی چارے دی فضا ہمیشہ قائم رکھن گے۔ اوہناں دا کہنا سی کہ اسیں جاننے آں تہاڈے جذبات وی ایہناں نال رلدے ملدے ہون گے۔ پاکستانی بھراواں دی خشی تے غم وچ برابر دے شریک ہوندے آں، 2014وچ اے پی ایس حملے اُتے ترکی نے دِن لئی سوگ وی منایا سی۔
اوہناںد ا کہنا سی کہ پاکستان نے وی ہر مشکل ویلے ساڈی مدد کیتی اے۔ پاکستان تے ترکی دیاں قدراں سانجھیاں نیں، پاک ترک دوستی ہور ودھ رہی اے۔ ترک صدر دا کہنا سی کہ ناکام فوجی بغاوت اُتے پاکستان دی پہلی حمایت دے شکر گزار آں۔اوہناں دا کہنا سی کہ گولن تحریک دہشت گرد تنظیم اے، ایس تنظیم دا پچھاں جاری رکھاں گے۔ اوہناں نے آکھیا کہ فتح اللہ گولن دی تنظیم خلاف جنگ وچ تعاون دا بھرپور شکریا ادا کرنا واں۔
اوہناں دا ہور کہنا سی کہ باغی طاقتاں نوں ملن والے اسلحے دے تانے بانے مغرب نال ملدے نیں۔ ترک صدر نے آکھیا کہ داعش دا اسلام نال کوئی تعلق نہیں اے، دین اسلام توحید و وحدیت دا پیامبر اے، اللہ دے سوا کوئی طاقت ساڈی شہ رگ توں زیادا نیڑے نہیں ہو سکدی۔ اوہناں نے آکھیا کہ اسلام تے دہشت نوں اک کرنا دین دے خلاف اے۔ سانوں اکٹھےاں ہو کے انج دے عناصر خلاف محاز آرائی کرنی چاہیدی۔
