اسلام آباد(پاکستان پوائنٹ نیوز17۔نومبر۔2016ء) وزیر اعظم میاں محمد نواز شریف تے ترک صدر طیب اردوان نے سانجھی نیوز کانفرنس نال خطاب کیتا۔ تفصیل دے مطابق نیوز کانفرنس کردے ہوئے وزیر اعظم نواز شریف دا کہنا سی کہ ترک صدر تے اوہناں دے وفد نوں جی آیاں آکھنے آں، پاکستان تے ترکی دے تعلقات منفرد نیں، ترکی دی لوکائی نے جمہوریت اُتے حملاناکام بنا دِتا، ترکی وچ بغاوت دی کوشش اُتے پاکستان نوں جھٹکا لگا۔
اوہناں دا کہنا سی کہ ترک قوم نے جمہوریت دی سربلندی لئی نویں تواریخ رقم کیتی، پاکستانی قوم ترکی دی نویں حکومت خلاف بغاوت دی نندیا کردی اے۔ اوہناں نے آکھیا کہ پاکستان ترکاں دا دوجا گھر اے۔ دویں ملکاں وچکار باہمی تعلقات تے محبت اے، اوہناں دا کہنا سی کہ اسیں غمی، خشی وچ اک دوجے نال آں۔ وزیر اعظم نے آکھیا کہ این ایس جی وچ پاکستان دی رکنیت لئی ترکی دی حمایت تعریف جوگ اے، 2017دوویں ملکاں دے سفارتی تعلقات دی 70ویں سالگرھا دا سال اے۔
وزیر اعظم دا کہنا سی کہ دوویں ملکاں وچکار تجارت تے سرمایا کاری وچ وادھا ہونا چاہیدا۔ ترک صدر طیب اردوان دا کہنا سی کہ پاکستان نال ترکی دے پرانے تعلقات نیں، شاندار استقبال کرن اُتے پاکستان دے شکر گزار آں۔ اوہناں نے آکھیا کہ پاکستان تے بھارت نوں کشمیر سنے سارے مسائل مذاکرات دے ذریعے حل کرنے ہون گے۔ اوہناں نے آکھیا کہ ترکی معاشی، اقتصادی، تجارتی تے عسکری سنے ہور شعبیاں وچ وی پاکستان نال تعاون جاری رکھے گا۔
ترک صدر دا کہنا سی کہ کشمیر دا مسئلا اقوام متحدا دیاں قرارداداں دے مطابق حل ہونا چاہیدا جدکہ مسئلا کشمیر دا فوری تے بامعنی حل چاہندے آں۔ اوہناں نے دسیا کہ وزیراعظم نواز شریف نال سوہنے انداز نال مذاکرات ہوئے، وزیر اعطم نواز شریف نال ملاقات وچ عالمی تے علاقائی امور اُتے وی گل بات کیتی گئی اے۔ اوہناں نے آکھیا کہ لائن آف کنٹرول اُتے کشیدگی دی صورتحال تشویش جوگ اے۔
