لدھڑ: بے نظیر انکم سپورٹ پروگرام بارے جعلی میسج گھلن والے 4بندے گرفتار

لدھڑ(پاکستان پوائنٹ نیوز17۔نومبر۔2016ء) بے نظیر انکم سپورٹ پروگرام بارے جعلی میسج کرن والے چار بندیاں نوں گرفتار کر لِتا گیا اے۔ تفصیل دے مطابق بے نظر انکم سپورٹ پروگرام بارے میسج تے ملدے ای رہندے نیں پر ایہناں وچ کئی میسج جعلی تے غیر قانونی وی ہوندے نیں۔ ایس معاملے نوں ویکھدے ہوئے پاکستان ٹیلی کمیونیکیشن اتھارٹی نے چالو ورھے جعلی میسج کرن والے بندیاں خلاف کارروائیاں شروع کر دِتیاں نیں۔

پچھلے دِنا ای ٹوبا ٹیک سنگھ دے دوالی علاقے وچ کیتی گئی اک کارروائی دے دوران چار بندیاں نوں گرفتار کر لِتا گیا اے۔ گرفتار کیتے گئے بندیاں وچ اکرم، اللہ دتہ، حنیف تے اسلام شامل نیں۔ پولیس دا کہنا اے کہ ایہناںبندیاں نے کئی موبائل نمبراں اُتے بے نظیر انکم سپورٹ پروگرام دے تحت 30ہزار رُپئے دے انعام دا میسج کیتا سی۔ مجرم معصوم شہریاں نوں انعام دا جھانسا دے کے پیسے وٹدے سن۔ پھڑے گئے بندیاں نے دسیا کہ اوہ معصوم شہریاں توں پیسے لے کے اوہناں دے نمبر بلاک کروان دے بعد ایہی کم دوجے لوکاں نال کردے سن۔ ایس فراڈ وچ ہور بندیاں وی ملوث نیں پر پولیس دا کہنا اے کہ ہور مجرم نسن وچ کامیاب ہو گئے نیں۔