کراچی(پاکستان پوائنٹ نیوز16۔نومبر۔2016ء) میئر کراچی وسیم اختر دی آخری مقدمے وچ وی ضمانت منظور ہو گئی اے۔ تفصیل دے مطابق میئر کراچی اُتے دہشت گرداں دے علاج وچ مدد دین بارے کیس دی سنوائی انسداد دہشت گردی دی عدالت وچ ہوئی جتھے عدالت نے میئر کراچی وسیم اختر سنے قادر پٹیل دی ضمانت وی منظور کر لئی اے۔ عدالت نے وسیم اختر تے قادر پٹیل نوں 5،5 لکھ رُپئے دے ضمانتی مچلکے وی جمع کروان دا حکم دِتا اے جدکہ عدالتی حکم دے مطابق وسیم اختر تے قادر پٹیل نوں اپنے پاسپورٹس وی عدالت وچ جمع کروانے ہون گے۔
آخری مقدمے وچ وی ضمانت منظور ہون دے بعد وسیم اختر خشی نال اپنے گھر والیاں نال گلے لگ گئے تے ایس دوران اوہناں دے گھر والیاں نے اوہناں نوں مبارک وی دِتی۔ ایس توں وکھ ایم کیو ایم نے میئر کراچی وسیم اختر دی رہائی دے بعد استقبال دیاں تیاریاں وی شروع کردِتیا ںنیں، ایم کیو ایم ولوں ریلی دی صورت وچ سینٹرل جیل دے باہر وسیم اختر دا استقبال کیتا جائے گا۔ وسیم اختر رہائی دے بعد شہیداں دے قبرستان وی جان گے۔ یا د رہوے کہ میئر کراچی وسیم اخترر اُتے جھیڑوی تقریر، دہشت گرداں دے علاج وچ مدد سنے ہور 39مقدمے درج نیں جدکہ میئر کراچی ایہناں سارے مقدمیاں وچ ضمانت کروان وچ کامیاب ہو گئے نیں۔
