اسلام آباد(پاکستان پوائنٹ نیوز08۔نومبر۔2016ء) پچھلے کُجھ دناں توں نیوز سائٹس اُتے انج دیاں خبراں پڑھن وچ آ رہیاں نیں کہ پاکستان تے آسٹریلیا وچکار ویزا فری سمجھوتے اُتے دستخط ہو گئے نیں تے ایہ اقدام دوویں ملکاں دے شہریاں لئی سفری اوکڑاں نوں دور کر ن لئی کیتا گیا اے۔ نیوز سائٹس دے مطابق آسٹریلیا نے پاکستانی پاسپورٹ رکھن والے بندیاں نوں ویزا فری انٹری دین دا اعلان کر دِتا اے۔
نیوز سائٹ اُتے موجود آرٹیکل وچ دسیا گیا کہ ایس سلسلے وچ اک بل پچھلے مہینے دی 9تاریخ توں پارلیمنٹ وچ التوا ہیٹھ سی جہنوں آخیر منظور کر لِتا گیا اے تے ایس منظوری دے تحت دوویں ملکاں وچکار سفری اوکڑاں نوں ہٹا دِتا جائے گا۔ ایس منظوری دے بعد پاکستان تے آسٹریلیا وچکار اک سمجھوتا ہویا جہدے تحت پاکستانی پاسپورٹ رکھن والا کوئی وی شہری ویزے دی پابندی دے بغیر آسٹریلیا دا دورا کر سکے گا۔
ایس پوسٹ دے مطابق آسٹریلیا جان لئی کسے وی بندے نوں دو ہزار آسٹریلین ڈالرز تے کاروباری شخصیت نوں 5ہزار آسٹریلین ڈالرز ظاہر کرنے ہون گے جدکہ مسافراں نوں اپنی ریٹرن ٹکٹ نوں بطور ثبوت وی وکھانا ہووے گا تے مسافر 90دناں تیکر اوتھے رہ سکن گے۔ ایس سمجھوتے اُتے عمل آن والے ورھے پہلی جنوری توں شروع ہووے گا پر تحقیقات دے بعد پتا لگا کہ ایہ سارا جھوٹھ اے جو سی این این دا ناں ورت کے اپنے پڑھن ہاراں نوں بے وقوف بنایا جا رہیا اے تاں جے اوہناں نوں ایہ لگے کہ اوہ عالمی شہرت رکھن والی سی این این دی ویب سائٹ پڑھ رہے نیں جدکہ ایس آرٹیکل وچ آسٹریلیا دے کسے وی ادارے دا ذکر تک نہیں کیتا گیا۔
وسیلیاں توں پتا لگا کہ ایس آرٹیکل نوں ویزا فری پراسیس اُتے تھوڑی پُن چھان دے بعد لکھیا گیا اے پر اوہنوں پڑھ کے خش ہون والے بندیاں لئی بُری خبر ایہ اے کہ ایہ آرٹیکل صرف اک دھوکھے دے سوا کوئی حیثیت نہیں رکھدا، پر سوشل میڈیا اُتے ورتیندڑاں تے پڑھن ہاراں توں درخاست اے کہ اوہ ایس قسم دیاں خبراں پڑھ کے اوہناں دی پُن چھان ضرور کر لیا کرن۔
