لاہور(پاکستان پوائنٹ نیوز23۔نومبر۔2018ء) ملک بھر وچ پانی دا بحران پیدا ہون دے خدشے نوں مُکھ رکھدے ہوئے وضو لئی ورتے جان والے پانی نوں ضائع کرن دی بجائے اوس پانی نوں شہر بھر وچ ہریالی ودھان لئی ورتن دا فیصلا کرلیاگیا۔تفصیل دے مطابق واسا(واٹر اینڈ سینی ٹیشن ایجنسی)ولوں جاری بیان وچ آکھیا گیا اے کہ مسجداں وچ وضو دوران ورتیا جان والا پانی ٹینکاں وچ محفوظ کیتا جائے گا تاں جے ایہ پانی ضائع نہ ہوئے تے ہریالی ودھان لئی کم آسکے۔
واسا دا آکھنا اے کہ لاہور وچ موجود کئی پارکاں نال بنیاں ہوئیاں مسجداں لئی انج دے واٹر ٹینک بنائے جان گے جیہناں وچ وضو دا پانی جمع کیتا جائے گا۔ واسا دے مطابق ایہ جمع کیتا گیا پانی لاہور دے پارکس وچ موجود بوٹیاں تے درختاں نوں دتا جائے گا۔ ایس فیصلے نال نہ صرف پانی ضائع ہون توں بچے گا بلکہ زمین ہیٹھ پانی دی سطح وی بہتر ہوئے گی۔ ایس سلسلے وچ وزیر ہاؤسنگ پنجاب محمود الرشید نے لاہور وچ واسا ولوں شروع کیتے جان والے اک پائلٹ پراجیکٹ دا افتتاح وی کر دتا اے۔ واسا دے مطابق ذکر کیتے گئے پائلٹ پراجیکٹ نوں پارکس اینڈ ہارٹی کلچر اتھارٹی دے سپرد کر دتا گیا اے۔پی ایچ اے پارکاں نال جُڑیاں مسجداں وچ ٹینکیاں بنائے گا۔
