چینی قونصلیٹ اُتے حملا:شہریاں دی جان بچان والا سکیورٹی گارڈ ساہمنے آگیا

فائرنگ دی آواز سُندے ای سکیورٹی گارڈ نے سارے لوکاں نوں محفوظ کیتا

چینی قونصلیٹ اُتے حملا:شہریاں دی جان بچان والا سکیورٹی گارڈ ساہمنے آگیا
فائرنگ دی آواز سُندے ای سکیورٹی گارڈ نے سارے لوکاں نوں محفوظ کیتا

کراچی(پاکستان پوائنٹ نیوز23۔نومبر۔2018ء) کراچی دے علاقے کلنٹن بلاک4وچ دہشت گرداں نے اج سویرے چینی قونصلیٹ اُتے حملے دی کوشش کیتی جیہنوں پولیس تے رینجرز دی بھرپور جوابی کارروائی نے ناکام بناندے ہوئے دہشت گرداں نوں ہلاک کر دتا۔پر ایس موقعے تے قونصل خانے وچ موجود سکیورٹی گارڈ نے اپنے حواس اُتے قابو رکھدے ہوئے قونصل خانے وچ موجود بندیاں نوں محفوظ کیتا۔

سکیورٹی گارڈ نے ویزا سیکشن وچ موجود بندیاں نوں محفوظ بنایا تے اوہناں دی جان بچائی۔ لوکاں دی جان بچان تے بہادری دا وکھالا کرن اُتے قونصل خانے دے سکیورٹی گارڈ نوں سیلوٹ پیش کیتا گیا۔ یاد رہوے کہ کراچی دے علاقے کلنٹن بلاک 4وچ دہشت گرداں نے اج سویرے چینی قونصلیٹ اُتے حملا کیتا جیہدے نتیجے وچ دو پولیس اہلکاراں سنے چار بندے ہلاک ہو گئے۔

دوجے پاسے بلوچ علیحدگی پسند تنظیم ’بلوچ لبریشن آرمی‘ نے ایس حملے دی ذمے واری قبول کیتی اے۔ برطانوی نشریاتی ادارے بی بی سی دے مطابق بلوچ علیحدگی پسند تنظیم دے ترجمان نے فون اُتے حملے دی ذمے واری قبول کردے ہوئے بی بی سی نوں دسیا کہ اوہناں دے تن ارکان ایس کارروائی وچ شامل نیں تے ایہ چین لئی اک تنبیہ اے۔ علیحدگی پسند تنظیم ’بلوچ لبریشن آرمی‘ دے اک ترجمان نے چینی قونصلیٹ اُتے حملے دی ذمے واری قبول کردے ہوئے بی بی سی نوں دسیا کہ اوہناں دے مجید بریگیڈ دے تن لوک ایس کارروائی وچ شامل سن۔

اوہناں نے آکھیا کہ ایہ چین لئی اک اشارہ اے کہ اوہ ساڈی زمین اُتے قبضے دی کوشش چھڈ دیوے نہیں تے آن والے ویلے نوں اوہنوں ہور خطرناک معاملات دا ساہمنا کرنا پئے گا۔ بلوچ لبریشن آرمی ولوں حملے دی ذمے واری قبول کرن دے تانے بانے بھارت نال وی ملدے نیں۔بھارت پاک چین تعلقات نوں خراب کرن دے نال نال پاک چین اقتصادی راہداری منصوبے نوں نقصان اپڑانا چاہندا اے۔یاد رہوے کہ بھارتی جاسوس کلبھوشن یادیو نے اپنے اعترافی بیان وچ ’بلوچ لبریشن آرمی‘ نوں بھارتی فنڈنگ دا انکشاف کردے ہوئے منیا سی کہ ایہ تنظیم بھارت دی ایما اُتے ای پاکستان وچ کارروائیاں کردی اے۔