لاہور(پاکستان پوائنٹ نیوز23۔اکتوبر۔2018ء) لاہور وچ ہون والی اک ہور ڈانس پارٹی دی ویڈیو وائرل ہو گئی اے۔ سوشل میڈیا اُتے وائرل ہون والی ویڈیو وچ نوجوان مُنڈے کُڑیاں اک دوجے نال نچ رہے نیں جدکہ اطلاع مطابق ذکر کیتی گئی پارٹی وچ شراب تے ہور نشے والیاں شیواں وی موجود نیں، جو پارٹی وچ موجود نوجواناں نے استعمال کیتیاں۔ایہناں ویڈیوز نوں ویکھ کے سوشل میڈیا ورتیندڑاں نے ڈاڈھے غصے دا اظہار کیتا تے پولیس نوں تنقید دا نشانہ بنایا۔ سوشل میڈیا ورتیندڑاں دا آکھنا اے کہ ایس توں پہلے پولیس تے انتظامیہ نوں جیویں ای انج دی کسے پارٹی دی خبر ملدی سی ،تے اوہ چھیتی ای اوتھے چھاپا ماردے ہوئے منتظمین نوں گرفتار کر کے اوہناں خلاف سخت کارروائی کردی سی پر پچھلے کُجھ دناں توں ہون والیاں ڈانس پارٹیاں اُتے پولیس یاں شہر دی انتظامیہ نے کوئی نوٹس نہیں لیا، جو دُکھ دی گل اے۔
یاد رہوے کہ پچھلے دیہاڑے کاہنہ دے دوالے علاقے دے نجی فارم ہاؤس وچ ہون والی پرتکلف ڈانس پارٹی دی ویڈیو ساہمنے آئی سی۔ ایس پارٹی وچ ایکسائز اینڈ ٹیکسیشن افسر حماد خان وی موجود سن، جدوں اوہناں کولوں پُچھیا گیا کہ تُسیں پارٹی وچ کیہ کر رہے او تے اوہ بولے کہ پیسے لین آیا واں جیہنوں بعد وچ اوہناں نے اک انٹرٹینمنٹ چیک دا ناں دے دتا، جیہدا کوئی وی ثبوت نہ دتا گیا۔
