کراچی(پاکستان پوائنٹ نیوز10۔اکتوبر۔2018ء) عوامی تھاواں اُتے سیر لئی موجود جوڑیاں نوں کئی وار پولیس اہلکاراں ولوں اوس ویلے پریشانی دا ساہمنا کرنا پیندا سی جدوں اوہناں کولوں نکاح نامہ منگیا جاندا تے نکاح نامے نہ ہون دی وجہ توں اوہناں نوں پولیس رشوت لے کے چھڈ دیندی سی پر ہن جوڑیاں کولوں نکاح نامے وکھان دی منگ کرن والے پولیس اہلکاراں نوں وی باز رہن دا حکم دتا گیا اے۔ایس حوالے نال مشہور اینکر رابطہ انم نے وی اک ٹویٹ کردے ہوئے آکھیا اے کہ آخر ایہ فیصلا ہو گیا۔ اوہناں نے آکھیا کہ اک وار میری دوست تے اوہدے گھر والے نوں سمندر اُتے روک لیا گیا سی تے پولیس نے دوناں نوں ویاہ دی تصویر ویکھن مگروں جان دی اجازت دتی۔
یا د رہوے کہ اج کراچی پولیس چیف ڈاکٹر امیر شیخ نے جوڑیاں کولوں نکاح نامے منگن والے پولیس اہلکاراں خلاف سخت کارروائی دا حکم دیندے ہوئے سارے اہلکاراں نوں آکھیا اے کہ سیر لئی گھروں باہر جان والے جوڑیاں کولوں نکاح نامہ نہ منگیا جائے۔ پولیس چیف نے پولیس اہلکاراں نوں وارننگ دیندے ہوئے آکھیا کہ کراچی وچ سیر لئی آن والیاں کولوں نکاح نامہ نہ منگیا جائے، نکاح نامہ منگن والے اہلکاراں خلاف قانونی کارروائی کیتی جائے گی۔
