حوصلا رکھو!،میں تہانوں اوکڑاں وچوں کڈھاں گا:وزیراعظم عمران خان

پہلیاں حکومتاں نے بے دردی نال قرضے لئے، اج سانوں قرضے دی قسط واپس کرن لئی ہور قرضہ چاہیدا، ملکی قرضہ 6000ارب رُپئے توں 30ہزار ارب تیکر اپڑ گیا اے:تقریب نال خطاب

حوصلا رکھو!،میں تہانوں اوکڑاں وچوں کڈھاں گا:وزیراعظم عمران خان
 پہلیاں حکومتاں نے بے دردی نال قرضے لئے، اج سانوں قرضے دی قسط واپس کرن لئی ہور قرضہ چاہیدا، ملکی قرضہ 6000ارب رُپئے توں 30ہزار ارب تیکر اپڑ گیا اے:تقریب نال خطاب

اسلام آباد(پاکستان پوائنٹ نیوز10۔اکتوبر۔2018ء) وزیر اعظم عمران خان نے ’نیا پاکستان ہاؤسنگ اتھارٹی‘ دے قیام دا اعلان کر دتا۔ تفصیل مطابق وزیر اعظم عمران خان نے ’نیا پاکستان ہاؤسنگ‘ منصوبے دی تقریب نال خطاب کردے ہوئے آکھیا کہ پہلیاں حکومتاں نے بے دردی نال قرضے لئے۔ اج سانوں قرضے دی قسط واپس کرن لئی ہور قرضہ چاہیدا۔ ملکی قرضہ 6000ارب رُپئے توں 30ہزار ارب تیکر اپڑ گیا اے۔

عمران خان نے آکھیا کہ جو اصلاحات اسیں کر رہے آں اوہدا اثر چھ مہینے مگروں ساہمنے آئے گا۔اوہناں دا آکھنا سی کہ ہر سال دس ارب ڈالر دی پاکستان وچ منی لانڈرنگ ہوندی ۔ 30ارب رُپئے دیاں ترسیلات زر پاکستان وچ ہر سال آؤندیاں نیں۔ ایہ پاکستانی تواریخ دا سبھ توں وڈا کسارا(خسارہ) اے۔ تحریک انصاف نوں 18ارب ڈالر دا کسارا پچھلی حکومت ولوں تحفے وچ ملیا اے۔

اوہناں دا آکھنا سی کہ آن والے دناں وچ پاکستان کول اینے ڈالرز نہیں نیں کہ قرضیاں دیاں قسطاں واپس کیتیاں جا سکن۔ سانوں قرضہ ایس لئی چاہیدا کہ قرضے دیاں قسطاں دینیاں نیں۔ اوہناں دا آکھنا سی کہ دس توں بارھاں ارب ڈالر دی کمی نوں پورا کرن لئی دو راہ نیں۔ دوست ملک یاں فیر آئی ایم ایف۔ عمران خان نے آکھیا کہ حوصلا رکھو گھبران والی گل نہیں اے۔ کُجھ چِر وچ اوکڑاں دور ہو جان گیاں۔ میں پاکستان نوں ایس اوکڑ وچوں کڈھاں گا ۔ مشکل ویلے مگروں چنگا ویلا آئے گا مطمئن رہوو۔