فیصل آباد(پاکستان پوائنٹ نیوز09۔اکتوبر۔2018ء) کُڑی نوں چھیڑن توں منع کرن اُتے ڈی ایس پی دے پُتر دا علاقہ واسیاں اُتے تشدد۔ تفصیل مطابق فیصل آباد وچ اک کُڑی نوں چھیڑن توں منع کرن اُتے اوہدے بھرا تے گھر والیاں نوں تشدد دا نشانہ بنایا گیا۔ تشدد دے الزام وچ ڈی ایس پی میانوالی دے پُتر شاہ زیب نیازی سنے 4ملزما ں نوں گرفتار کر لیا گیا اے۔ فیصل آباد دے علاقے مدینہ ٹاؤن دے رہائشی تے متاثرہ کُڑی دے والد شفاقت علی نے پولیس نوں درخاست دتی۔
درخاست وچ اوہدا آکھنا سی کہ شاہ زیب نیازی تے اوہدے ساتھیاں نے گھر دے باہر اوہدے پُتر تے ہور گھر والیاں نوں تشدد دا نشانہ بنایا۔درخاست وچ ہور آکھیا گیا کہ ڈی ایس پی اسد اللہ نیازی دے پُتر نے ساتھیاں سنے پچھلی رات گھر دے باہر موجود گھر والیاں اُتے حملا کر دتا۔ حملا آواراں نے پُتر تے گھر والیاں نوں تشدد دا نشانہ بنایا تے گھر دا بوہا وی توڑ دتا۔ ملزم شاہ زیب پولیس نمبر دی گڈی نوں استعمال کر دا اے۔ اوہناں دا ہور آکھنا سی کہ ملزم شاہ زیب نے اک ہور سرکاری افسر دے بھرا نال رلکے گینگ بنایا ہویا اے۔ ایہ ملزم علاقہ واسیاں نوں تنگ کردے نیں۔ گھر اُتے حملے تے مار کُٹ دی سی سی ٹی وی فوٹیج ویکھن مگروں شاہ زیب نیازی سنے چار ملزماں نوں گرفتار کر لیا گیا اے۔
