اسلام آباد (پاکستان پوائنٹ نیوز01۔اکتوبر۔2018ء) اسلام آباد ہائیکورٹ نے پیپلز پارٹی دے سابق سینیٹر فیصل رضا عابدی دی اک دن لئی حفاظتی ضمانت منطور کردے ہوئے ٹرائل کورٹ وچ پیش ہون دا حکم دے دتا اے۔ تفصیل مطابق سابق سینیٹر فیصل رضا عابدی تے اوہناں دے تن نامعلوم ساتھیاں خلاف سپریم کورٹ دے ججاں دی توہین کرن، بے عزتی کرن تے دھمکیاں دین دے الزام وچ تھانا سیکرٹریٹ اسلام آباد وچ مقدمہ درج اے تے اوہناں دی گرفتاری لئی چھاپے وی مارے جا رہے نیں پر پیپلز پارٹی دے سابق رہنما نے گرفتاری توں پہلاں اسلام آباد ہائی کورٹ نال رابطہ کیتا۔
پیر نوں درخاست اُتے کیس دی سنوائی جسٹس اطہر من اللہ تے جسٹس میاں گل حسن اورنگزیب نے کیتی۔ سنوائی دوران فیصل رضا عابدی دے وکیل کولوں پُچھیا گیا کہ ٹرائل کورٹ کتھے اے۔ وکیل نے جواب دتا کہ ٹرائل کورٹ اسلام آباد وچ اے جیہدے اُتے جسٹس اطہر من اللہ نے ریمارکس دتے کہ اک ای شہر دی عدالت وچ پیش ہون لئی حفاظتی ضمانت دا کوئی تصور نہیں، فیصل رضا نوں ضمانت قبل از گرفتار دی درخاست دائر کرنی چاہیدی۔ عدالت نے منگل تیکر لئی فیصل رضا عابدی دی حفاظتی ضمانت منظور کردے ہوئے حکم دتا کہ فیصل رضا عابدی ٹرائل کورٹ وچ پیش ہون۔
