لاہور(پاکستان پوائنٹ نیوز29۔ستمبر۔2018ء) غریب بال نوں ننگے پیریں ویکھ کے ڈولفن فورس دے اہلکار نے بال نوں جُتی لے دتی۔سوشل میڈیا اُتے ڈولفن فورس دے اہلکار دی ویڈیو وائرل ہوگئی۔تفصیل مطابق پولیس اُنج تے لوکائی دی خدمت کردی ای رہندی اے پر کدی کدی ایس طرحاں لوکائی دی خدمت کردی اے کہ سبھ دے دلاں نوں جت لیندی اے۔ اجیہی ای اک ویڈیو سوشل میڈیا اُتے وائرل ہو رہی اے ۔ ویڈیو وچ ویکھیا گیا کہ ڈولفن فورس دے اہلکار کول اک نِکا بال کھلوتا اے جو دُکان وچوں اپنی جُتی پسند کر رہیا اے۔ جُتی پسند آؤندے ای نِکے بال نے پیراں وچ پائی تے خُشی نال دُکان توں باہر نس گیا۔
سوشل میڈیا اُتے وائرل ہون والی ایس ویڈیو بارے دسیا گیا کہ ڈولفن فورس دے اہلکار نے بال کولوں جُتی دا پُچھیا تے پتا لگا کہ اوہدے کول جُتی مُل لین دے پیسے نہیں نیں۔ جیہدے اُتے ڈولفن فورس دا اہلکار اوہنوں نیڑے موجود دُکان وچ لے گیا تے اوہنوں جُتی مل لے کے دتی۔ دوجے پاسے سوشل میڈیا اُتے ڈولفن فورس دے اہلکار دے ایس کم نوں سلاہیا جا رہیا اے۔ سوشل میڈیا ورتیندڑاں دا آکھنا اے کہ ایس اہلکار دی نیکی توں واضح ہو گیا اے کہ دنیا وچ اجے وی انسانیت زندہ اے۔سوشل میڈیا ورتیندڑاں کہنا سی کہ کُجھ لوک اپنے آلے دوالے موجود بے سہارا لوکاں دا دُکھ نہیں ویکھ سکدے تے اوہناں دی ہر ممکن مدد کرن دی کوشش کردے نیں۔
