کیہ چیف جسٹس سیاست کرنا چاہندے نیں:خورشید شاہ

پیپلز پارٹی بھاشا ڈیم دی اُساری دے حق وچ اے پر اسیں کالا باغ ڈیم دے مخالف آں ،ڈیم فنڈنگ تے جرمانیاں نال نہیں بندے:میڈیا نال گل بات

کیہ چیف جسٹس سیاست کرنا چاہندے نیں:خورشید شاہ
 پیپلز پارٹی بھاشا ڈیم دی اُساری دے حق وچ اے پر اسیں کالا باغ ڈیم دے مخالف آں ،ڈیم فنڈنگ تے جرمانیاں نال نہیں بندے:میڈیا نال گل بات

سکھر(پاکستان پوائنٹ نیوز29۔ستمبر۔2018ء) پیپلز پارٹی دے رہنما خورشید شاہ نے آکھیا اے کہ چیف جسٹس کولوں پُچھیا جائے کہ کیہ اوہ سیاست کرنا چاہندے نیں۔ سکھر وچ پرچاکاراں نال گل بات کردے ہوئے خورشید شاہ نے آکھیا کہ پیپلز پارٹی نے ہمیشہ لوکاں نوں روزگار دتا پر چالو (موجودہ)حکومت روزگار دین دی بجائے روزگار کھوہ رہی اے تے حکومت خلاف بولن والیاں اُتے مقدمے بنائے جا رہے نیں۔

اوہناں دا کہنا سی کہ میری زندگی کُھلی کتاب اے، میں عام انتخابات وچ 8وار کامیاب ہویا آں تے میرے اُتے لوکائی نوں اعتماد اے۔ پیپلز پارٹی دے رہنما دا کہنا سی کہ میں یاں میرے گھر والیاں نے کسے دی اک انچ زمین اُتے قبضہ نہیں کیتا۔ میں 10توں 15ارب دی زمین خالی کروائی، جے میں کوئی کرپشن کیتی اے تے پارلیمنٹ دی کمیٹی بناؤ تے تحقیقات کرو۔ پیپلز پارٹی دے رہنما نے آکھیا کہ جو وی حکومت آئی اے اپنے آپ نوں تحفظ دین لئی سرکلر ڈیٹ دا سہارا لیندی اے۔

اوہناں دا کہنا سی کہ سپریم کورٹ سیاست دا حصہ بنن جا رہی اے۔ چیف جسٹس صاحب کولوں پُچھیا جائے کہ کیہ اوہ سیاست کرنا چاہندے نیں؟خورشید شاہ نے آکھیا کہ ملک وچ پانی دے ذخائر نہیں نیں۔ پیپلز پارٹی بھاشا ڈیم دی اُساری دے حق وچ اے پر اسیں کالا باغ ڈیم دے مخالف آں تے اوہنوں نہیں بننا چاہیدا۔ ڈیم فنڈنگ تے جرمانیاں نال نہیں بندے۔چیف جسٹس پاکستان وفاقی حکومت نوں بجٹ دا 15فیصد ڈیم دی اُساری لئی رکھن دا حکم دین۔

اوہناں نے آکھیا کہ گھر بنان دا اعلان چنگا اے۔سپورٹ کردے آں پر اعلان نال کُجھ نہیں ہوئے گا اپوزیشن حکومت نوں پورے تعاون دی یقین دہانی کروا رہی اے۔ اوہناں نے آکھیاکہ تعاون دی یقین دہانی مگروں غیر سنجیدگی دا وکھالا کیتا جا رہیا اے۔ جس وزیر دے جو مونہ آ رہیا اے اوہ آکھی جا رہیا اے۔