اسلام آباد(پاکستان پوائنٹ نیوز24۔ستمبر۔2018ء) تحریک انصاف دی حکومت نوں بنے اجے اک مہینہ ای ہویااے۔ ایس حوالے نال پاکستان تحریک انصاف دی حکومت وزیر اعظم عمران خان دی قیادت وچ تاریخی فیصلے کر رہی اے تے اپنے 100دناں دے پلان دے نشانے(اہداف) لئی کوششاں کیتیاں جا رہیاں نیں۔ ایس حوالے نال جتھے کُجھ عوامی مقبولیت دے فیصلے کیتے جا رہے نیں اوتھے کُجھ مشکل فیصلے وی ویکھن وچ آ رہے نیں۔
پر نویں حکومت دا منصوبہ اے کہ اوہ چھیتی توں چھیتی پاکستان دے وسائل نوں ودھان ول توجہ دیوے۔ ایس حوالے نال وزیر اعظم عمران خان دی صدارت ہیٹھ مشترکہ مفادات کونسل دا اجلاس اسلام آباد وچ ہویا۔ اجلاس وچ سندھ تے خیبرپختونخوا وچ تیل تے گیس دی بھال لئی خاص سہولتاں دین دی تجویز بارے غور کیتا گیا اے۔ اجلاس وچ فیصلا کیتا گیا اے کہ تیل تے گیس ذخائر دی بھال لئی ہور سہولتاں دین دا معاملا ای سی سی نوں گھلیا جائے گا۔
