راولپنڈی(پاکستان پوائنٹ نیوز17۔ستمبر۔2018ء) چیف آف آرمی سٹاف جنرل قمر جاوید باجوہ تے چینی فوج دے سربراہ جان ہان ویگیو وچکار ملاقات ہوئی اے۔ ملاقات دوران سکیورٹی صورتحال تے سی پیک بارے وچار وٹاندرا کیتا گیا۔ پاک فوج دے شعبہ تعلقات عامہ (آئی ایس پی آر) مطابق آرمی چیف جنرل قمر جاوید نے اج پیپلز لبریشن آرمی ہیڈ کوارٹر دا دورہ کیتا۔ جتھے آرمی چیف جنرل قمر جاوید باجوہ نے چینی فوج دے سربراہ جنرل ہان ویگیو نال ملاقات کیتی۔
چینی فوج دے سربراہ نے پاک فوج دیاں دہشت گردی خلاف جنگ وچ کامیابیاں دی تعریف کیتی۔ چینی فوج دے سربراہ نے دوناں ملکاں وچکار دفاعی تعاون نوں ہور ودھان دی خاہش دا اظہار کیتا۔ پیپلز لبریشن آرمی دے سربراہ جنرل ویگیو نے آکھیا کہ سی پیک لئی پاک فوج دی سکیورٹی دا معیار تعریف جوگ اے۔ انسداد دہشت گردی لئی پاک فوج دے تجربے توں فائدہ چُکن دے خاہشمند آں۔
آرمی چیف جنرل قمر جاوید باجوہ نے مثالی باہمی فوجی تعاون اُتے اطمیان دا اظہار کردے ہوئے آکھیا کہ دوناں ملکاں دیاں فوجاں وچکار تعاون دی سوہنی تاریخ اے۔ دوناں ملکاں دیاں فوجاں وچکار تعاون ہور ودھایا جا سکدا اے۔یاد رہوے کہ آرمی چیف جنرل قمر جاوید باجوہ کل وائس چیئرمین سنٹرل ملٹری کمیشن نال ملاقات کرن گے۔ آرمی چیف جنرل قمر جاوید باجوہ پچھلے دیہاڑے چین دے تن دناں دے دورے اُتے چین اپڑے سن۔ جتھے اوہناں نوں گارڈ آف آنر وی پیش کیتا گیا۔
