پاکستان نے چین نال رلکے ڈالر توں جان چھڈوان دا منصوبہ بنالیا

پاکستان دی چین نوں مقامی کرنسی وچ تجارت کرن دی تجویز

پاکستان نے چین نال رلکے ڈالر توں جان چھڈوان دا منصوبہ بنالیا
پاکستان دی چین نوں مقامی کرنسی وچ تجارت کرن دی تجویز

اسلام آباد(پاکستان پوائنٹ نیوز18۔ستمبر۔2018ء) پاکستان نے چین نال رلکے ڈالر توں جان چھڈوان دا منصوبہ بنالیا۔پاکستان نے تجویز دتی اے کہ دوناں ملکاں وچکار تجارت مقامی کرنسی وچ ہونی چاہیدی۔ تفصیل مطابق پاکستان تے چین دے تعلقات ہمیشہ مثالی رہے نیں۔ چین نے ہمیشہ ای ہر موقعے اُتے پاکستان دی مدد کیتی تے عالمی فورمز اُتے وی پاکستانی موقف دی حمایت کیتی اے۔

سی پیک دی صورت وچ چین نے 62ارب ڈالر دا اجیہا شاندار تحفہ پاکستان نوں دتا اے جو ایس خطے دی تقدیر بدل سکدا اے۔ ایس ویلے جدوں پاکستان نوں ڈالراں دی کمی دا ساہمنا اے ، پاکستان تے چین نے ڈالر توں جان چھڈوان دا منصوبہ بنا لیا اے۔ پاکستان نے چین نوں تجویز دتی اے کہ دوناں ملکاں وچکار تجارت مقامی کرنسی وچ ہونی چاہیدی۔ ایس سلسلے وچ پاکستان دے وزیر قانون فروغ نسیم نے چینی سفیر نال ملاقات کیتی۔

وفاقی وزیر قانون بیرسٹر فروغ نسیم نے تجویز پیش کیتی اے کہ پاکستان تے چین وچکار مسائل دے حل لئی سانجھا میکنزم ہونا چاہیدا۔ اوہناں نے آکھیا کہ ایس لئی مباحثہ ٹربیونل دا قیام ضروری اے۔ اوہناں نے آکھیا کہ دوناں ملکاں وچکار کمرشل معاملات پاکستانی رُپئے ، چینی کرنسی تے یاں فیر کسے سانجھی کرنسی وچ ہونے چاہیدے۔ وفاقی وزیر نے ایہ تجویز چین دے سفیر یاؤ جنگ نال ملاقات دوران دتی،جیہدا اوہناں خیر مقدم کیتا۔