لاہور(پاکستان پوائنٹ نیوز17۔ستمبر۔2018ء) وزیر اعلا پنجاب عثمان بزدار پرچا کاراں دے سوالاں توں گھبرا گئے، سارے سوالاں دا اک ای جواب دتا کہ معاملا عدالت وچ اے ایہدے اُتے گل نہیں کرنی چاہیدی۔ میڈیا رپورٹس مطابق ڈی پی او پاکپتن تبدیلی کیس وچ سپریم کورٹ نے اج وزیر اعلا پنجاب نوں سدیا۔ وزیر اعلا پنجاب پیشی مگروں عدالتوں باہر نکلے تے میڈیا نے اوہناں نوں گھیر لیا۔
میڈیا نے اوہناں کولوں سوال کیتا کہ آر پی او تے ڈی پی او نوں وزیر اعلا ہاؤس سد کے اپنے قائد دے حکماں دی خلاف ورزی نہیں کیتی؟وزیر اعلا پنجاب نے جواب دتا کہ معاملا عدالت وچ اے ایہدے اُتے گل نہیں کرنی چاہیدی۔ وزیر اعلا پنجاب نے حکومت وچ مانیکا خاندان دی آئینی حیثیت کیہ اے؟دے سوال اُتے وی جواب دین توں پرہیز کیتا۔ اوہناں کولوں فیر سوال کیتا گیا کہ تہانوں وزیر اعلا بنان وچ احسن گجر دا کیہ کردار اے؟وزیر اعلا نے جواب دتا کہ پچھلے دیہاڑے نہیں آسکیا ایس لئی عدالت اج آ گیا واں۔
پچھلی پیشی اُتے وی آنا سی تے عدالت نوں سچ دسنا سی۔ پرچا کار نے سوال کیتا کہ ڈی پی او دے تبادلے اُتے تہانوں وزیر اعظم ہاؤس ولوں شاباش ملی؟وزیر اعلا پنجاب نے جواب دتا کہ معاملا عدالت وچ اے ایہدے اُتے گل نہیں کرنی چاہیدی، کوئی ہور گل کرو۔ تے انج وزیر اعلا پنجاب میڈیا توں جان چھڈا کے چلے گئے۔
