اسلام آباد(پاکستان پوائنٹ نیوز15۔ستمبر۔2018ء) وزیر اعظم عمران خان نے اپنے توں پہلاں بنن والے وزیر اعظماں دے استعمال ہیٹھ رہن والیاں لگژری گڈیاں نوں نیلام کرن دا اعلان کیتا سی۔ جو گڈیاں نیلامی لئی پیش کیتیاں جا رہیاں نیں اوہناں وچ 17گڈیاں وزیر اعظم ہاؤس تے وزیر اعظم آفس جدکہ 15گڈیاں دوجیاں وزارتاں، ڈویژناں تے ڈیپارٹمنٹس دیاں نیں۔ پر ہن نیلامی لئی پیش کیتیاں جان والیاں گڈیاں دے حوالے نال اک ہور انکشاف ساہمنے آیا اے۔ سوشل میڈیا اُتے وائرل ہوئی اک ویڈیو وچ ڈیلر دا کہنا سی کہ وزیر اعظم عمران خان نے جو گڈیاں نیلامی لئی پیش کیتیاں نیں، ایہ صرف اک سستی شہرت لئی کیتا گیا اے۔ ویڈیو وچ موجود بندے نے اک گڈی ول اشارہ کردے وئے دسیا کہ ایس گڈی اُتے ٹیکس 39لکھ رُپئے دینا پئے گا جدکہ مارکیٹ وچ ایس حالت دی رجسٹرڈ گڈی20توں 25لکھ رُپئے وچ آسانی نال مل سکدی اے۔پر اوہناں نے ایتھے 35لکھ رُپئے لکھیا ہویا اے تے ایس گڈی اُتے اسیں 39لکھ رُپئے صرف ڈیوٹی دینی اے۔ اوہنوں مُل لین مگروں اوہدے اُتے دس فیصد ود ہولڈنگ ٹیکس دینا اے، جیہدے مگروں ایہ رجسٹرڈ ہوئے گی تے ایہدے اُتے وی خرچہ آئے گا۔ ویڈیو وچ موجود بندے دا کہنا سی کہ فرض کرو ایتھے گڈی دی بولی اک لکھ رُپئے توں شروع ہوندی اے ، تے سوال ایہ پیدا ہوندا اے کہ ایہ بولی اک لکھ رُپئے توں شروع ہو کے کتھوں تیکر جائے گی؟جے فرض کرئیے 10لکھ رُپئے اُتے بولی رُک جاندی اے فیر دس لکھ تے ایہ والی رقم ملا کے گڈی تقریبن 50توں 55لکھ رُپئے دی ہو جائے گی۔ویڈیو وچ موجود بندے دا کہنا سی کہ جے میں 50توں 55لکھ دی ایہو گڈی لینی اے تے ایہدے توں چنگا میں 2006یاں 2007ماڈل ایس کلاس نہ لے لواں۔ کیونکہ ایس گڈی دی مارکیٹ قیمت 50لکھ رُپئے نہیں اے۔ ایہ اوہناں نے صرف لوکاں نوں خش کرن لئی کیتا اے۔لوک آن گے تے اُنجے ای واپس چلے جا ن گے کیونکہ ایس گڈی لئی کوئی وی 50لکھ رُپئے دین لئی تیار نہیں ہوئے گا۔
