اسلام آباد(پاکستان پوائنٹ نیوز15۔ستمبر۔2018ء) وفاقی وزیر برائے انسانی حقوق شیریں مزاری دی سوشل میڈیا اُتے وائرل ہون والی تصویراُتے ہن اوہناں دی دھی ایمان مزاری دا ردعمل وی ساہمنے آگیا اے۔ شیریں مزاری دی دھی ایمان مزاری نے مائیکرو بلاگنگ ویب سائٹ ٹویٹر اُے اپنے پیغام وچ آکھیا کہ ایہ تصویر جیہنے وی بنائی اے اوہنے ضرور میری والدہ نوں غصہ چڑھایا ہوئے گا۔ جدوں اوہناں نوں بہت غصہ آؤندا اے یاں اوہ کسے گل اُتے ناراض ہوندیاں نیں تے اوہ اوسے ویلے تھوڑے چِر لئی اکھاں بند کر لیندیاں نیں۔ اپنے ٹویٹر پیغام وچ ایمان مزاری نے ہور آکھیا کہ میری والدہ میرے اُتے غصہ کرن توں پہلاں انج ای کردیاں نیں۔
یاد رہوے کہ کجھ دن پہلاں پاکستان تحریک انصاف دی رہنما و وفاقی وزیر دی اک تصویر سوشل میڈیا اُتے وائرل ہو ئی سی۔ جیہدے وچ اوہناں نوں سوندے ہوئے ویکھیا جا سکدا سی۔ جدکہ تصویر وچ اوہ اپنے سرکاری دفتر وچ موجود سن۔ دوجے پاسے سوشل میڈیا ورتیندڑاں ولوں تصویر اُتے دلچسپ قسم دے تبصرے وی کیتے گئے سن۔ کُجھ سوشل میڈیا ورتیندڑاں دا کہنا سی کہ تحریک انصاف والے تے تبدیلی دا نعرہ لاؤندے سن پر اوہ آپ نیندر دے مزے لے رہے نیں جدکہ کُجھ سوشل میڈیا ورتیندڑاں نے آکھیا سی کہ نویں حکومت وچ وزیر دن رات کم کر رہے نیں تے اوہ تھک جاندے نیں۔ایس لئی اوہناں دے آرام کرن وچ کوئی مسئلا نہیں اے۔
