اسلام آباد(پاکستان پوائنٹ نیوز15۔ستمبر۔2018ء) پاکستانی معیشت نوں بجلی دے بحران کارن سالہوار5.8ارب ڈالر دے نقصان دا ساہمنا اے جو مجموعی قومی پیداوار (جی ڈی پی) دے 2.6فیصد دے برابر اے۔ عالمی بنک دی’ الیکٹریفیکیشن اینڈ ہاؤس ہولڈ ویلفیئر‘ ریسرچ رپورٹ مطابق پاکستان نوں توانائی دے شعبے وچ بنیادی اصلاحات لیان دی ضرورت اے تاں جے توانائی پیدا کرن تے ونڈن دے مسئلیاں اُتے قابو پایا جا سکے ۔
ایہناں اصلاحات نال ڈسٹری بیوشن دے نقصان اُتے قابو پایا جا سکدا اے تے ورتیندڑاں لئی توانائی دی قیمت تے ادائیگی دے مسئلے نوں ختم کیتا جا سکے گا۔رپورٹ مطابق پاکستان وچ 97.5فیصد آبادی نوں بجلی دی سہولت دستیاب اے جیہدے وچ 99.7فیصد شہری جدکہ 95.6فیصد پینڈو آبادی شامل اے۔ عالمی بنک دی کھوج مطابق بجلی دی بغیر کسے وقفے دے فراہمی تے اوہدی ونڈ دے نقصان اُتے قابو پا کے قومی معیشت نوں سالہوار(سالانہ) تقریبن 6ارب ڈالر دے نقصان توں بچایا جا سکدا اے۔
