لاہور(پاکستان پوائنٹ نیوز01۔ستمبر۔2018ء) پاکستان مسلم لیگ (ن) دے صدر محمد شہباز شریف نے آکھیا اے کہ احتساب نوں انتقام بنا کے کسے دی سیاست ختم نہیں کیتی جا سکدی، الیکشن توں پہلاں جو صورتحال طاری کیتی گئی اوہدے مگروں وی لوکائی نے ساڈے اُتے اعتماد کیتا، اوکھا ویلا لوکائی نال ساڈا رشتہ ختم نہیں کر سکدا تے انشااللہ چنگا ویلا وی آئے گا، عمران خان نے لوکائی نال وعدے کیتے نیں تے ہن اوہ ڈلیور کر کے وکھان۔
نجی ٹی وی مطابق غیر رسمی گل بات کردے ہوئے شہباز شریف نے آکھیا کہ عمران خان نے جو 100دناں دا پلان دتا اے بطور اپوزیشن جماعت اوہدے اُتے ڈونگھی نظر اے تے مِتھے ویلے مگروں ایہدے اُتے بھرپور پریس کانفرنس کیتی جائے گی۔ اوہناں نے آکھیا کہ احتساب نوں انتقام بنا کے کسے دی سیاست نوں ختم نہیں کیتا جا سکدا۔ الیکشن توں پہلاں جو صورتحال طاری کیتی گئی اوہدے مگروں وی لوکائی نے ساڈے اُتے اعتماد کیتا۔
اوکھا ویلا لوکائی نال ساڈا رشتہ ختم نہیں کر سکدا تے انشااللہ چنگا ویلا وی آئے گا۔اوہناں نے آکھیا کہ اوکڑاں(مشکلات) سوان یاں دبن لئی نہیں آؤندیاں بلکہ جگان لئی آؤندیاں نیں۔ شہباز شریف دا کہنا سی کہ ساڈی حکومت مگروں ہن تحریک انصاف دی حکومت اے تے عمران خان نے وڈے دعوے کیتے سن تے ہن ڈلیور کر کے وکھان۔ ساڈی حکومت نے ملکوں توانائی بحران ختم کیتا تے 11ہزار میگا واٹ بجلی نیشنل گرڈ وچ شامل کیتی ، اسیں اوہناں دی کارکردگی وی ویکھاں گے۔
