اسحاق ڈار دا بچنا ناممکن

اسلام آباد(پاکستان پوائنٹ نیوز31۔اگست۔2018ء) اسلام آباد دی احتساب عدالت نے سابق وزیر خزانہ اسحاق ڈار خلاف آمدن توں ودھ اثاثہ جات ریفرنس وچ دو گواہواں عمر دراز تے بشارت محمود دا بیان ریکارڈ کر لیا پر تیجے گواہ دا بیان ریکارڈ نہیں ہو سکیا، عدالت نے ہور تن گواہواں نوں سد لیا۔ جمعے نوں احتساب عدالت وچ سابق وزیر خزانہ اسحاق ڈار خلاف آمدن توں ودھ اثاثہ جات ریفرنس دی سنوائی جج محمد بشیر نے کیتی۔

سنوائی دوران استغاثہ دے گواہ عمر دراز دا بیان ریکارڈ کیتا گیا، اک ہور گواہ اشتیاق احمد نوں ہور دستاویزات نال پنج ستمبر نوں سد لیا گیا، استغاثہ دے دوجے گواہ بشارت محمود دا بیان وی قلمبند کیتا گیا۔ بشارت محمود نے اپنے بیان وچ آکھیا کہ پہلی نومبر 2017نوں نیب لاہور توں کال آف نوٹس ملیا سی، نیب وچ 2004توں کلرک دیاں خدمتاں انجام دے رہیا واں۔ احتساب عدالت وچ تیجے گواہ دا بیان قلمبند نہیں ہو سکیا۔ احتساب عدالت نے ہور تن گواہواں نوں سد لیا۔ ہور گواہواں وچ اشتیاق احمد، محسن احمد، طارق سلیم شامل نیں۔ عدالت وچ ریفرنس دی ہور سنوائی 5ستمبر تیکر ملتوی کر دتی گئی۔ ایس توں پہلاں سنوائی وچ استغاثہ دے چار گواہواں دے بیان قلمبند کیتے گئے سن۔