مینوں تِن مہینے دیو فیر احتساب کرنا:عمران خان

امریکا دی کوئی غلط گل نہیں منی جائے گی،نواز شریف نے باہرلے ملک دوریاں اُتے ارباں رُپئے خرچ کیتے، سردار عثمان بزدار دلیر بندہ، جے ہیلی کاپٹر کھڑا رہیا تے خراب ہو جائے گا ، صرف ہفتے وچ دو وارہیلی کاپٹر استعمال کرنا واں:سینئر پرچاکاراں نال ملاقات دوران گل بات

مینوں تِن مہینے دیو فیر احتساب کرنا:عمران خان
امریکا دی کوئی غلط گل نہیں منی جائے گی،نواز شریف نے باہرلے ملک دوریاں اُتے ارباں رُپئے خرچ کیتے، سردار عثمان بزدار دلیر بندہ، جے ہیلی کاپٹر کھڑا رہیا تے خراب ہو جائے گا ، صرف ہفتے وچ دو وارہیلی کاپٹر استعمال کرنا واں:سینئر پرچاکاراں نال ملاقات دوران گل بات

اسلام آباد(پاکستان پوائنٹ نیوز31۔اگست۔2018ء) وزیر اعظم عمران خان دی سینئر پرچا کاراں نال ملاقات ہوئی اے۔ ملاقات دوران وفاقی وزیر خارجا شاہ محمود قریشی تے وزیر اطلاعات فواد چودھری وی موجود سن۔ ملاقات دی اندرونی کہانی دسدے ہوئے مشہور پرچا کار حامد میر دا کہنا سی کہ ملاقات دوران دو وار فرانس دے صدر دا فون آیا تے عمران خان نے آکھیا کہ اجے مصروف آں بعدوں سُناں گا۔

وزیر اعظم عمران خان وزیر خارجا دی درخاست اُتے فون سُنن گئے۔ عمران خان نے آکھیا ہن میں صرف اوہناں ملکاں دا دورہ کراں گا جیہدا پاکستان نوں فائدہ ہوئے۔ اوہناں نے آکھیا کہ نواز شریف نے باہرلے ملک دوریاں اُتے ارباں رُپئے خرچ کیتے۔ وزیر اعظم نال وزیر اعلا پنجاب بارے گل ہوئی تے اوہناں نے آکھیا کہ سردار عثمان بزدار دلیر بندے نیں۔ عمران خان نے کُھل کے وزیر اعلا پنجاب دی حمایت کیتی پر جدوں ڈی پی او پاکپتن دا معاملا بحث ہیٹھ آیا تے عمران خان نے آکھیاکہ سارے حقائق سپریم کورٹ ساہمنے آ جان گے۔

اوہناں نے ہیلی کاپٹر والے معاملے اُتے آکھیا کہ جے ہیلی کاپٹر کھڑا رہیا تے ایہ خراب ہو جائے گا صرف ہفتے وچ دو وار اوہنوں استعمال کرنا واں۔ میں ایس لئی سڑک دے راہ توں نہیں جاندا کہ مینوں سکیورٹی والیاں خبردار کیتا اے ۔ میں لوکائی نوں مسئلیاں توں بچان لئی ہیلی کاپٹر اُتے سفر کرنا واں۔ اوہناں نے آکھیا کہ ہن کوئی سفارش نہیں چلے گی۔ احتساب شروع ہون اُتے لوک آکھن گے کہ جمہوریت خطرے وچ اے پر اسیں احتساب دا عمل جاری رکھاں گے۔

وزیر اعظم دا کہنا سی کہ گردشی قرضے 1200ارب تیکر اپڑ گئے نیں، جدوں تیکر ملک وچ احتساب نہیں ہوئے گا ملک ترقی نہیں کر سکدا۔ جدوں اوہناں کولوں اپوزیشن بارے سوال کیتا گیا تے عمران خان نے آکھیا کہ ایہ ویکھن وچ تے بہت وڈی اپوزیشن نظر آؤندی اے پر ایہ ملکی تاریخ دی کمزور ترین اپوزیشن اے کیونکہ ایہ اپوزیشن صرف کرپٹ لوکاں دا دفاع کرنا جان دی اے۔

پاک امریکا تعلقات بارے وزیر اعظم عمران خان دا کہنا سی کہ امریکا دی کوئی غلط گل نہیں منی جائے گی۔ امریکا نال لڑ نہیں سکدے، اوہناں نال تعلقات بہتر کراں گے۔ ایس توں وکھ وی عمران خان نے پرچا کاراں نال کئی امور اُتے گل بات کیتی جو اوہناں نے آف دی ریکارڈ رکھن نوں آکھیا۔ وزیراعظم عمران خان نے پرچا کاراں نوں آکھیا کہ مینوں تن مہینے دا ویلا دیو تے ایہدے مگروں بے شک تنقید کرو۔حامد میر دا کہنا سی کہ عمران خان دے رویے وچ وی بہت تبدیلی ویکھن وچ آئی اوہ ہن صبر توں کم لیندے نیں۔حامد میر دا کہنا سی کہ پہلاں ساڈی وزیر اعظم ہاؤس وچ بہت سیوا کیتی جاندی سی پر اج صرف چاہ تے بسکٹ پیش کیتے گئے۔