چودھری نثار علی خان دا باہرلے ملک رہن دا فیصلا:وسیلے

اسلام آباد(پاکستان پوائنٹ نیوز29۔اگست۔2018ء) چودھری نثار علی خان دا باہرلے ملک رہن دا فیصلا، سابق وزیر داخلا الیکشن وچ ہار مگروں غائب نیں، امریکا وچ گھر والیاں نال رہن گے۔ تفصیل مطابق پاکستان دے سابق وزیر داخلا و سینئر سیاستدان چودھری نثار علی خان کئی دناں توں غائب نیں۔ چودھری نثار راولپنڈی دے علاقے چکری توں تعلق رکھدے نیں تے اپنی سیاست دے شروع توں ای ایس علاقے توں الیکشن جِتدے آئے نیں۔

پر 25جولائی نوں ہون والے الیکشن وچ چودھری نثار علی خان نوں اپ سیٹ ہار دا ساہمنا کرنا پیا۔ سابق وزیر داخلا چودھری نثار ہمیشہ ای مسلم لیگ (ن) دے ٹکٹ توں الیکشن لڑدے سن۔ پر 25جولائی دے الیکشن وچ پہلی وار انج ہویا کہ چودھری نثار نے اپنی پارٹی دی قیادت دیاں پالیسیاں خلاف بغاوت کردے ہوئے آذاد حیثیت وچ الیکشن لڑن دا فیصلا کیتا، جو اوہناں لئی غلط ثابت ہویا۔اوہ اک پنجاب اسمبلی دی سیٹ تے جت گئے پر دو قومی اسمبلی دیاں سیٹاں توں ہار گئے۔اوہناں اپنی پنجاب اسمبلی دی سیٹ دا اجے تیکر حلف وی نہیں چُکیا۔جیہدے مگروں آکھیا جا رہیا اے کہ چودھری نثار علی خان نے اپنے خاندان نال امریکا وچ رہن دا فیصلا کیتا اے۔